1 छुत्काराया नखः सिधय्धुंकाः अन दुपिं इस्राएलीत यहूदाया शहर शहरय् वन। इमिसं पुजा याइगु ल्वहंत तछ्यानाबिल अले अशेरा द्यःमय्जुया थांत त्वाल्हानाबिल। इमिसं यहूदा न्यंक अले बेन्यामीन, एफ्राइम व मनश्शेया थः द्यःतय्त पुजा याइगु थाय् थासय् वेदीत स्यंकाबिल। उलि यायेधुंकाः इस्राएलीत सकलें थथःगु शहरय् व छेँय् लिहां वन।
2 अनंलि हिजकियां पुजाहारीत व लेवीतय्त इमिगु पुचः पुचःकथं व छम्ह छम्ह मनूयात वयागु सेवाकथं परमप्रभुया देगलय् यायेगु ज्याया जिम्मा बिल, होमबलि व मेलबलि छायेगु व देगःया लुखा लुखाय् सुभाय् व प्रशंसा बीगु।
3 जुजुं थःगु हे सम्पत्तिं परमप्रभुया व्यवस्थाय् च्वया तः थें सुथय् व बहनिया होमबलिया निंतिं, अले विश्रामबार, अमाइ व क्वःछिनातःगु नखःचखःया निंतिं पशुत दान बिल।
4 पुजाहारीत व लेवीतय्सं परमप्रभुया व्यवस्थाया ज्या मन बियाः याये फयेमा धकाः जुजुं यरूशलेमय् च्वंपिं मनूतय्त पुजाहारीत व लेवीतय्त ल्यं दुगु भाग ब्यु धकाः आज्ञा बिल।
5 अथे आज्ञा जुइवं इस्राएलयापिं मनूतय्सं थःगु अन्न, न्हूगु दाखमद्य, जैतूनया चिकं, कस्ति व बुँइया फुक्क कथंया न्हापां सःगु बिल। इमिसं थःके दुगु फुक्क खँया झिब्वय् छब्व नं हल।
6 यहूदाया शहर शहरय् च्वंपिं मनूत सकसिनं थथःगु सा द्वहं व फैच्वलय्या झिब्वय् छब्व अले परमप्रभु इमि परमेश्वरयात देछाःगु फुक्क झिब्वय् छब्व हयाः द्वँचिन।
7 इमिसं स्वंगूगु लाय् मुंकेगु शुरु यात, अले न्हय्गूगु लाय् सिधय्कल।
8 हिजकिया व वया भारदारत अन वःबलय् इमिसं मुंकातःगु द्वँ खन। अले इमिसं परमप्रभुयात व वय्कःया प्रजा इस्राएलया मनूतय्त धन्य धाल।
9 हिजकियां द्वँ चिनातःगु देछाया बारे पुजाहारीत व लेवीतय्त न्यन।
10 सादोकया परिवारयाम्ह तःधंम्ह पुजाहारी अजर्याहं लिसः बिल, “मनूतय्सं थःगु देछा देगलय् छाये हःबलय् निसें जिमित नयेत गाक्क दत अले ल्यंगु नं दु। परमप्रभु थः प्रजायात सुवाः बियादीगुलिं थुलिमछि ल्यंगु नं दु।”
11 अले हिजकियां परमप्रभुया देगलय् धुकूत दय्केत आज्ञा बिल। अनंलि उपिं धुकूत दय्के सिधय्कल।
12 मनूतय्सं विश्वास यायेबहः जुयाः थथःगु भेटी व झिब्वय् छब्व शुद्ध याःगु देछा हल, उपिं फुक्क धुकूया हामा लेवी कोनन्याह खः, अले वया किजा शिमी वयात ग्वाहालि याइम्ह खः।
13 जुजु हिजकिया व परमेश्वरया देगःया मू हाकिम अजर्याहं कोनन्याह व किजा शिमीयात ग्वाहालि यायेत यहीएल, अजज्याह, नहत, असाहेल, यरीमोत, योजाबाद, एलीएल, यिस्मक्याह, महत व बनायाहयात ल्यःगु खः।
14 परमप्रभुयात छाय्हःगु भेटी शुद्धयागु देछा इनाबीत परमेश्वरया निंतिं हःगु थःयसें देछा लेवी यिम्नाया काय् पुर्बया लुखाया पालय् कोरेया जिम्माय् खः।
15 पुचः पुचःकथं बुरापिं व ल्याय्म्हपिं पुजाहारीतय्त बराबर यानाः इनाबीत पुजाहारीतय्गु शहर शहरय् अदन, मिन्यामीन, येशूअ, शमायाह, अमर्याह व शकन्याहं कोरेयात विश्वास यायेबहः जुयाः ग्वाहालि यात।
16 वंशावलीइ नां च्वयातःपिं परमप्रभुया देगलय् न्हियान्हिथंया ज्या यायेत वनीपिं स्विदँ स्वयां च्वय्यापिं मिजंत सकसितं इमिगु थथःगु पुचः व इमिगु जिम्माय् दुगु ज्या स्वयाः इमिसं भाग इनाबिल।
17 वंशावलीइ थथःगु परिवारकथं नां च्वयातःपिं पुजाहारीत अले निइदँ व व स्वयां च्वय्यापिं लेवीत सकसितं नं इमिसं इमिगु पुचः व इमिगु जिम्माय् दुगु ज्या स्वयाः भाग इनाबिल।
18 थुपिं वंशावलीया सफुलिइ नां च्वयातःपिं फुक्क खलः, इमि कलाःपिं व काय्म्ह्याय्पिंनापं सकसितं भाग इनाब्यूगु खः। छाय्धाःसा इमिसं नं थःपिन्त विधिकथं शुद्ध याःगु खः।
19 भाग बीत हारून वंशयापिं मनूत नं नांकथं ल्यल, लेवीतय्गु वंशावलीइ नां च्वयातःपिं वया परिवारयापिं मिजंपिं व मिजंमस्त नं ल्यल। थुपिं पुजाहारीत व इमि सन्तानतय्सं थ्व भाग इमिगु थथःगु शहरय् व उपिं शहरया जःखः च्वंगु ख्यलय् काल।
20 हिजकियां यहूदाय् न्यंक हे थथे ज्या यात। वं परमप्रभु थः परमेश्वरया मिखाय् छु भिंगु, खःगु व विश्वास याये बहःगु खः व हे ज्या यात।
21 परमप्रभुया देगःया सेवाय् व छु छु ज्या वं परमेश्वरया देगःया सेवाय् अले व्यवस्था व आज्ञाया खँय् थः परमेश्वरयात मालेत यात, व वं दुनुगलंनिसें यात अले व ताःलात।