1 इस्राएलयापिं सकल हाकिमतय्त दाऊद जुजुं यरूशलेमय् मुनेगु आज्ञा बिल। उकिं कुल कुलयापिं नायःत, जुजुया सेवा याइपिं पुचः पुचःयापिं कप्तानत, द्वःछिम्ह व सछिम्ह सिपाइँया कप्तानत अले जुजु व वया काय्पिनिगु फुक्क सम्पत्ति सा द्वहं स्वइपिं हाकिमत, दरबारयापिं भारदारत, बहादुर मनूत व मू मू सिपाइँत यरूशलेमय् मुन।
2 अले दनाः दाऊद जुजुं धाल, “हे जिमि दाजुकिजा व थः मनूत, जिगु खँ न्यँ। जिं परमप्रभु परमेश्वरया बाचाया सनूया निंतिं, परमेश्वरया पाउदानया निंतिं न्ह्याबलें दयाच्वनीगु छगू देगः दय्केगु इच्छा यानागु खः। अले जिं व दय्केत तयारी नं याना।
3 तर परमेश्वरं जितः थथे धयादिल, ‘जिगु नांया निंतिं छं देगः दय्के खनी मखु, छाय्धाःसा छ लडाइँ याइम्ह मनू खः छंगु ल्हातं यक्व हि बाः वये धुंकूगु दु।’
4 “परमप्रभु, इस्राएलयाम्ह परमेश्वरं जिमि अबुया फुक्क परिवारया दथुं जितः इस्राएलय् शासन यायेत ल्ययादिल। वय्कलं यहूदायात नायःकथं ल्ययादिल, अले यहूदाया कुलं जिगु परिवारयात ल्ययादिल, उगु परिवारं जितः कयाः इस्राएल न्यंकयाम्ह जुजु दय्केगु वय्कलं इच्छा यानादिल।
5 वय्कलं जितः यक्व काय्पिं बियादिल अले वय्कलं इपिं मध्ये सोलोमनयात परमप्रभुया राज्य इस्राएलय् शासन यायेत ल्ययादिल।
6 परमप्रभुं जितः धयादिल, ‘जिगु देगः व चुकत दय्कीम्ह छिमि काय् सोलोमन जुइ। जिं वयात जिम्ह काय् जुइत ल्ययागु दु, अले जि वया बौ जुइ।
7 वं आः थें होश यानाः जिगु फुक्क नियम व आज्ञा मानय् यानाच्वन धाःसा जिं वयागु राज्य न्ह्याबलेंया लागि पलिस्था याये।’
8 “उकिं जिं छिमित फुक्क इस्राएल व परमप्रभुया खलकं खंक व झी परमेश्वरं ताय्कः थ्व जिम्मा बियाच्वनागु दु – परमप्रभु छिमि परमेश्वरयागु उजं होशियार जुयाः मानय् या। अले छिमिसं थ्व भिंगु देशय् अधिकार याये फइ। अले थुकियात न्ह्याबलेंया निंतिं छिमि सन्तानयात सर्बयकथं बी फइ।
9 “हे जिमि काय् सोलोमन, छं थः बौया परमेश्वरयात म्हसीकि, अले तनमनं वय्कःया सेवा या। वय्कलं झीगु फुक्क बिचाः व इच्छा स्यू। वय्कःयात माल धाःसा छं वय्कःयात नापलाकी, तर छं वय्कःयात त्वःतल धाःसा वय्कलं छन्त न्ह्याबलेंया लागि त्वःतादी।
10 परमप्रभुं थःगु पवित्र देगः दय्केत छन्त ल्ययादीगु दु धइगु खँ छं सीकेमा। उकिं साहस यानाः उगु ज्या या।”
11 अले दाऊदं थःकाय् सोलोमनयात देगःया दलान व उकिया छेँ धुकू, कःसि, दुनेया क्वथात व प्रायश्चित यायेगुथाय् दुगु तच्वकं पवित्रगु थाय्या नक्सा बिल।
12 वं थःम्हं बिचाः याःगु चुकत, उकिया प्यखेरं च्वंगु क्वथात, परमेश्वरया देगःया ज्वलंत व परमप्रभुयात छाःगु देछात तइगु क्वथाया नक्सा नं बिल।
13 दाऊदं वयात पुजाहारीत व लेवीतय्गु ज्याया बारे, परमप्रभुया देगःया सेवाया फुक्क ज्या व देगलय् छ्यलीगु फुक्क थलबलया बारे उजं बिल।
14 थीथी कथंयागु सेवाय् छ्यलीगु लुँया ज्वलंया निंतिं लुँयागु तौल व थीथी कथंया सेवाय् छ्यलीगु वहःया ज्वलंया निंतिं वहःया तौल वं क्वःछिना बिल।
15 वं लुँया त्वाःदेवा व उकिया मत थलयागु निंतिं व वहःयागु त्वाःदेवा व उकिया मत थलयागु निंतिं माःगु तौल क्वःछिनाबिल।
16 छायेहःगु मरिया छगू छगू तेबिलया निंतिं लुँयागु तौल व वहःयागु तेबिलया निंतिं वहःयागु तौल वं क्वःछिनाबिल।
17 वं काँटा, छ्वाकिगु बाता व करुवायागु लागि भिंगु लुँयागु तौल अले फुक्क लुँ व वहःयागु खोल्चाया निंतिं माःगु तौल क्वःछिनाबिल।
18 गुँगू थनेगु वेदीया निंतिं नं भिंगु लुँयागु तौल वं क्वःछिनाबिल। पपू चक्कंकाः परमप्रभुया बाचाया सनूयात त्वपुइपिं लुँया करूबतय्गु रथ दय्केत नं वं नक्सा बिल।
19 दाऊदं धाल, “थुपिं फुक्क परमप्रभुयागु ल्हातं हे दय्कूगु नक्सा खः, थ्व नक्साया फुक्क छता छता खँ वय्कलं जितः थुइकादीगु दु।”
20 हानं दाऊदं थःकाय् सोलोमनयात धाल, “बल्लाः व साहसी जुयाः थ्व ज्या या। ग्याये मते, नुगः क्वतुंके मते, परमप्रभु परमेश्वर, जिमि परमेश्वर छनापं दी। परमप्रभुया देगःया सेवाया निंतिं फुक्क माःगु ज्या छं पूरा मयातले वय्कलं छन्त ग्वाहालि बियाच्वनी, वय्कलं छन्त त्वःतादी मखु।
21 परमेश्वरया देगःया फुक्क ज्या यायेत पुजाहारीतय्गु व लेवीतय्गु पुचः थन तयार दु। छंगु फुक्क ज्याय् लय्तातां छन्त ग्वाहालि बीपिं ज्या सःपिं कारीगरत तयार दु। अले हाकिमत व फुक्क मनूतय्सं छं छु धाल व हे याइ।”