1 छुं ई लिपा अम्मोनीतय् जुजु नाहाश सित, अले वया काय् हानून जुजु जुल।
2 दाऊद जुजुं धाल, “जिं हानूनयात माया यायेमाः, छाय्धाःसा वया बौ नाहाशं जितः न्ह्याबलें माया याःगु खः।” उकिं बिचाः हनाः वं दूतत छ्वल।
3 अम्मोनी नायःतय्सं थः जुजुयात धाल, “छिं स्वयादीबलय् दाऊदं छिमि बाःयात इज्जत यानाः बिचाः हनेत थुपिं मनूत छ्वयाहःगु धकाः च्वनादिया ला? अथे खः हे मखु। वं ला झीगु देश त्याका कायेगु लागिं चिवा कायेत इमित छ्वयाहःगु खः।”
4 उकिं हानूनं दाऊदया मनूतय्त ज्वनाः इमिगु दाह्री खानाबिल। अले इमिगु वसः दथुइ जँ तक हे चानाबियाः इमित लितछ्वल।
5 इपिं छेँय् लिहां वयेत तसकं मछाल। छुं मनूतय्सं वनाः दाऊदयात व खँ कनाबिल, अले दाऊदं इमित दाह्री ताहा मजुतले यरीहो शहरय् च्वनाच्वँ धकाः खबर छ्वल।
6 आः जिपिं दाऊदया मिखाय् तसकं बांमलाःपिं मनूत जुइ धुंकल धकाः हानून जुजु व अम्मोनीतय्सं सिल। उकिं इमिसं च्वय्यागु अराम-नाहारैम, अराम-माका व सोबां रथ व सारथीत बालं कयाहयेत ३४,००० किलोग्राम वहः छ्वल।
7 इमिसं ३२,००० रथनापं माकाया जुजु व वया सेनात बालं कयाहल। माकायाम्ह जुजुया सेना वयाः मेदबाया लिक्क छाउनी तयाः च्वन। सकल अम्मोनीत नं थथःगु शहरं लडाइँ यायेत पिहां वल।
8 दाऊदं व खँ न्यनाः योआब व वया थः दक्व सिपाइँतय्त इपिं लिसे लडाइँ यायेत छ्वल।
9 अम्मोनीत वयाः शहरया मू ध्वाखाया न्ह्यःने लडाइँ यायेत तयार जुयाच्वन। ग्वाहालि ब्यूवःपिं जुजुपिन्सं चक्कंगु ख्यलय् थथःगु थाय् काल।
10 योआबं थःगु न्ह्यःने व ल्युने लडाइँया लागि शत्रुया सिपाइँत तयार जुयाच्वंगु खनाः वं इस्राएलयापिं ल्ययातःपिं सिपाइँतय् पुचःयात अरामीतलिसें ल्वायेत छ्वल।
11 ल्यंदुपिं मेपिं सिपाइँतय्त वं थःकिजा अबीशैया अधीनय् तल, अले इमित अम्मोनीत लिसे ल्वायेत छ्वल।
12 योआबं अबीशैयात धाल, “अरामीतय्सं जितः बुकाच्वंगु खन धाःसा छ वयाः जितः ग्वाहालि ब्यु, अम्मोनीतय्सं छन्त बुकाच्वंगु खन धाःसा जि वयाः छन्त ग्वाहालि बी।
13 बल्ला व साहसी जु! अले थःगु जाति व झी परमेश्वरया शहरतय्गु निंतिं मग्यासें लडाइँ यायेनु। अले परमप्रभुयात छु याये यः वय्कलं व हे यानादी।”
14 अले योआब व वया सिपाइँतय्सं अरामीतय्त हमला यात। अरामीत योआब वया सिपाइँतय् न्ह्यःनं बिस्युं वन।
15 अले अरामीत बिस्युं वनाच्वंगु खनाः अम्मोनीत अबीशैया न्ह्यःनं बिस्युं वनाः शहर दुने दुहां वन। अनंलि योआब यरूशलेमय् लिहां वल।
16 इस्राएलीतलिसें थःपिं बुइ धुंकूगु खँ अरामीतय्सं सिल। इमिसं यूफ्रेटिस खुसिया पुर्ब हददेजेरया सेनापति शोपकया अधीनय् दुपिं मेपिं अरामीतय्त सःतके छ्वल।
17 व खँ न्यनाः दाऊदं सकल इस्राएली सिपाइँतय्त मुंकल। दाऊदं इमित यर्दन खुसिया उखे यंकल। वं इस्राएलीतय्त अरामीतय् न्ह्यःने थन। अले इमिसं वनापं लडाइँ यात।
18 तर अरामीत इस्राएलीतपाखें बिस्युं वन। अले दाऊदं इमि न्हय्द्वःम्ह रथ चलय् याइपिं व पिइद्वःम्ह सिपाइँतय्त स्यानाबिल। अले इमिसं अरामी सेनापति शोपकयात नं स्यात।
19 हददेजेरया अधीनय् च्वंपिं जुजुपिन्सं जिमित इस्राएलं त्याकल धकाः सियाः दाऊदलिसें सन्धियात अले वयागु अधीनय् च्वन। अनंलि अरामीतय्सं हाकनं अम्मोनीतय्त ग्वाहालि बीगु इच्छा मयात।