1 आँऊ शमौन पतरस एसा चिट्ठिया खे लिखणे लगी रा, जो यीशु मसीह रा दास और प्रेरित ए। ये चिट्ठी आँऊ तिना सबी लोका खे लिखणे लगी रा जिने म्हारे परमेशर और उद्धारकर्ता यीशु मसीह री धार्मिकता रे जरिए आसा जेड़ा बऊत किमती विश्वास पाई राखेया।
2 आँऊ प्रार्थना करूँआ कि जिंयां तुसे परमेशर और म्हारे प्रभु यीशु मसीह रे ज्ञानो रे बड़दे जाओए, परमेशर तुसा लोका खे ओर बी जादा कृपा और शान्ति देंदा रओ।
3 परमेशरे आपणी ई सामर्था रे जरिए आसा खे से सब कुछ देई राखेया जो ईश्वरीय जिन्दगी जिऊणे खे जरूरी ए। आसे परमेशरो खे जाणूंए और तिने ई आसे सब आपणे लोक करी की आपणी महिमा और अच्छे इरादे रे मुताबिक बुलाए।
4 परमेशरे आसा सबी खे तेसा ई सामर्था रे जरिए बऊत किमती और बड़े वादे देई राखे। ताकि इना वादे रे जरिए तुसे तिना गन्दे कामो ते छूटी की नठी सको जो दुनिया रे बुरी इच्छा ते ओए और ईश्वरीय सबाओ रे शामिल ऊई जाओ।
5 कऊँकि तुसे ईश्वरीय सबाओ रे शामिल ओ इजी खे सिर्फ तुसे मसीह रे विश्वास करने वाल़े ई नि बणो पर अच्छे चाल-चलणो ते बी जिओ। तुसे सिर्फ अच्छे चाल-चलणो तेई नि जिओ पर ये बी जाणो कि आसे किंयां समजा साथे बर्ताव करिए।
6 तुसे सिर्फ समजा ते बर्ताव करने वाल़े ई नि बणो पर आपू पाँदे काबू राखणे वाल़े बी बणो। तुसे सिर्फ आपू पाँदे काबू राखणे वाल़े ई नि बणो पर दुःखो रे सब्र राखणे वाल़े बी बणो। तुसे सिर्फ दुःखो रे सब्र राखणे वाल़े ई नि बणो पर ईश्वरीय जिन्दगी जिऊणे वाल़े बी बणो।
7 सिर्फ ईश्वरीय जिन्दगी जिऊणे वाल़े ई नि बणो पर एकी दूजे री चिन्ता करने वाल़े बी बणो जिंयां पाई-बईण एकी दूजे री चिन्ता करोए। सिर्फ एकी दूजे री चिन्ता करने वाल़े ई नि बणो पर सबी लोका ते प्यार बी राखो।
8 जे तुसा रे यो सब गुण मौजूद ए और जे तुसा रे इना गुणा री बड़ोतरी ऊणे लगी री तो इजी री बजअ ते तुसे आसा रे प्रभु यीशु मसीह रे पूरे ज्ञानो रे ना तो नकम्मे ऊणे और ना ई निष्फल ऊणे।
9 पर जेस केसी मांणूए रे ये गुण मौजूद निए तो से अन्दा ए या तेसखे तूँदल़ा दिखोआ। से पूली चुकी रा कि परमेशरे तेसरा से सारा पाप माफ करी ता रा जो तिने मसीह रे आऊणे ते पईले करी राखेया था।
10 इजी बजअ ते ओ साथी विश्वासियो, आपणे बुलाए जाणे और चूणे जाणे खे साबित करने खे ठीक-टंगो रे कोशिश करदे रओ। जे तुसे एड़ा करदे रओगे, तो कदी बी बाटा ते नि पटकणे।
11 ईंयां ई तुसा रा म्हारे प्रभु और उद्धारकर्ता यीशु मसीह रे अनन्त कालो रे राज्य रे बड़े आदरो साथे स्वागत कित्तेया जाणा।
12 हालाँकि तुसे इना गल्ला खे जाणो ईए और मसीह री एसा सच्ची शिक्षा रे, जो तुसा खे सखाई राखी, तुसे बणे रे रओए। तेबे बी आऊँ तुसा खे इना गल्ला री याद दलाणे खे सदा त्यार रऊँगा।
13 जदुओ तक आऊँ एस शरीर रूपी डेरे रे जिऊँदा ए तदुओ तक तुसा लोका खे याद दलाई की सावधान करना आपणी जिम्मेवारी समजूँआ।
14 कऊँकि आऊँ ये जाणूंआ कि आसा रे प्रभु यीशु मसीह रे बोले रे वचनो रे मुताबिक मेरे मरने रा बखत नेड़े आईगा रा।
15 इजी री खातर मां एड़ी कोशिश करनी कि मेरे मरने ते बाद तुसे इना सबी गल्ला खे याद करी सको।
16 जेबे आसे प्रेरिते तुसा लोका खे आपणे प्रभु यीशु मसीह री सामर्था रा और तिना रे वापस आऊणे रा संदेशा दित्तेया था, तो आसे चलाकिया ते गढ़ी री मनकड़न्त काणियां रा सआरा नि लया था। बल्कि आसे आपू ई आपणी आखी ते तेसरा प्रताप देखेया था।
19 आसे ये बी जाणूंए कि भविष्यबक्तेया जो वचन मसीह रे बारे लिखी राखेया से एकदम सच ए और आसे तुसा लोका खे मसीह रे बारे रे जो सखाई राखेया था से इजी गल्ला खे साबित करोए। तुसे इना वचना खे आसा रे प्रभु यीशुए रे वापस आऊणे तक त्यानो साथे सुणो, कऊँकि जिंयां दिऊआ लोका खे न्हेरे रे सई बाट दखाणे खे प्रयासा देओआ तिंयाँ ई एस वचनो तुसा खे समजणे रे मताद करनी कि सच क्या ए। तिना रा वापस आऊणा नये दिनो रे प्यागा रे प्रयासे जेड़ा ऊणा और से प्याणु तारे जेड़ा चमकणा। तेस बखते तिना री ज्योति तुसा रे दिलो रे चमकणी और तेस परमेशर तुसा पाँदे साफ-साफ प्रकट करना।
20 पर सबी ते पईले ये समजी लो कि पवित्र शास्त्रो री कोई बी भविष्यबाणी केसी रे आपणे ई सोचणे ते पूरी नि ऊँदी
21 कऊँकि कोई बी भविष्यबाणी मांणूए री इच्छा ते कदी पनि ऊई, पर भविष्यबक्ता पवित्र आत्मा ते परी की परमेशरो री तरफा ते बोलो थे।