1 जौ सब सुनकै पिलातुस ईसु कै कोड़ा मरवाई।
2 सिपईय्या कांटेदार झाड़िन की हँगईय्यन कै मोड़कै कांटे को मुकुट बाके मुड़िया मैं पहनाईं, और बाकै बैंगनी रंग के लत्ता पहनाईं,
3 और उनके झोने आए कै कहेन लागे, “ओ यहूदियन के राजा, जीते रहौ!” और बाकै चाँटा मारीं।
4 तौ फिर पिलातुस दुआरे निकरकै लोगन से कही, “देखौ, मैं बाकै फिर से तुमरे झोने लाथौं; ताकी तुम जानलेबौ कि मैं बामै कोई गलती नाय पाथौं।”
5 तौ फिर ईसु कांटे को मुकुट और बैंगनी रंग के लत्ता पहनकै दुआरे निकरो; और पिलातुस उनसे कही, “देखौ, जौ है बौ आदमी!”
6 जब मुखिया पुजारी और रखबरेया बाकै देखीं, तौ चिल्लाए कै कहीं, “बाकै क्रूस मैं चढ़ाबौ, क्रूस मैं चढ़ाबौ!” पिलातुस उनसे कही, “तुम्हईं बाकै लैकै क्रूस मैं चढ़ाबौ, काहैकि मैं बामै कोई गलती नाय पाथौं।”
7 यहूदि लोग बाकै जबाब दईं, “हमरो भी नियम है और बौ नियम के हिसाब से बौ मरनो चाहिए, काहैकि बौ अपने आपकै परमेस्वर को लौड़ा बताथै।”
8 जब पिलातुस जौ बात सुनी तौ बौ भौत डराय गौ।
9 और फिर बौ महल के भीतर गौ, और ईसु से कही, “तैं कहाँ को है?” पर ईसु बासे एक अखरा तक नाय मस्की।
10 पिलातुस बासे कही, “का तैं मोसे नाय मसकैगो? समझले, मोकै तोए छोड़न को अधिकार है और तोकै क्रूस मैं भी चढ़ान को अधिकार है।”
11 ईसु जबाब दई, “मेरे ऊपर तेरो जहे ताहीं अधिकार है कि जौ अधिकार तोए परमेस्वर दई है। इसलै जो आदमी मोए तोकै सौंपी, बौ एक बुरे पाप को कसूरवार है।”
12 जब पिलातुस जौ सुनी, तौ बौ ईसु कै कैसियो करकै छोड़न के ताहीं कोसिस करी, पर यहूदि चिल्लाए-चिल्लाए कै कहीं, “अगर तैं जाकै छोड़ देगो, तौ जाको मतलब है कि तैं कैसर सम्राट को दोस्त ना है! जो कोई अपने आपकै राजा बनाथै बौ कैसर को सामना करथै।”
13 जे बात सुनकै पिलातुस ईसु कै दुआरे लाई और बौ न्याय करन बारी जघा मैं जोकै चबूतरा कहो जाथै,बौ हिसाब करन ताहीं बैठगौ, जो इब्रानी मैं “गब्बता” कहो जाथै।
14 और जौ फसह के एक दिन पहले को दिन रहै, फिर पिलातुस यहूदियन से कही, “देखौ, जहे है तुमरो राजा!”
15 पर बे चिल्लाईं, “बाकै मार डारौ! बाकै मार दियौ! बाकै क्रूस मैं चढ़ाबौ!” पिलातुस उनसे कही, “का मैं तुमरे राजा कै क्रूस मैं चढ़ामौं?” मुखिया पुजारी कहीं, “कैसर कै छोड़कै हमरो और कोई राजा ना है।”
16 तौ बौ ईसु कै उनके हाथ मैं सौंप दई ताकी बौ क्रूस मैं चढ़ाओ जाबै, तौ फिर बे ईसु कै हूँना से लैगै।
17 ईसु अपनो क्रूस उठाएकै बौ जघा ले दुआरे गौ, जो “खोपड़ी कि जघा” कहो जाथै, इब्रानी मैं जाकै “गुलगुता” कहो जाथै।
18 हूँना बे बाकै क्रूस मैं चढ़ाईं; और बे दुई और आदमिन कै सूली मैं चढ़ाय दईं, बे ईसु के इतै-उतै सूली मैं चढ़ाय गै रहैं, और ईसु बीच मैं सूली मैं चढ़ाओ गौ रहै।
19 पिलातुस एक खबर लिखकै और बाकै क्रूस मैं लटकाए दई और बामै ऐसे लिखो पड़ो रहै कि, “ईसु नासरी यहूदियन को राजा।”
20 गजब यहूदियैं जाकै पढ़ी, काहैकि जो जघा मैं ईसु कै क्रूस मैं चढ़ाओ गौ रहै, बौ जघा सहर के झोनेई रहै और बौ इब्रानी और लतीनी और यूनानी मैं लिखो भौ रहै।
21 तौ फिर यहूदियन के मुखिया पुजारी पिलातुस से कहीं, “यहूदियन को राजा मत लिखै उल्टा ऐसे लिख कि बौ कही, ‘मैं यहूदियन को राजा’ हौं।”
22 पिलातुस जबाब दई, “मैं जो लिख दौ, सो लिख दौ।”
23 जब सिपईय्या ईसु कै क्रूस मैं चढ़ाय चुके, तौ बाके लत्ता लैकै बाके चार टुकड़ा करीं, और हर एक सिपईय्यन के ताहीं एक टुकड़ा, और बाको कुरता लै लईं, जो कि बौ कुरता तरे से ऊपर तक बिनो भौ और बिना सिलो भौ रहै;
24 फिर बे आपस मैं बतकाईं, “आपन जे लत्तन कै नाय फाड़ैं, और जामैं चिट्ठी डारैं कि जे लत्ता कौनके होंगे।” जौ इसलै भौ, कि सास्त्र की बात पूरी होबै,और सिपईय्या ऐसोई करीं।
25 ईसु के क्रूस के झोने बाकी अईय्या और बाकी अईय्या की बहेनिया मरियम, क्लोपास की बईय्यर और मरियम मगदलीनी ठाड़ी रहैं।
26 ईसु अपनी अईय्या और बौ चेला कै जोसे बौ प्यार करत रहै झोने ठाड़े भै देखकै अपनी अईय्या से कही, “जौ तेरो लौड़ा है।”
27 फिर बौ चेला से कही, “जौ तेरी अईय्या है।” और बहे समय से बौ चेला, बाकै अपने घरै रहन ताहीं लैगौ।
28 जाके बाद ईसु जौ जानकै कि अब सब कछु पूरो हुई चुको; इसलै कि पवित्र सास्त्र मैं जो कहो गौ बौ पूरो होबै फिर कही, “मैं प्यासो हौं।”
29 हूँना दाखरस को एक सिरका से भरो भौ बर्तन धरो रहै, इसलै बे सिरका के भीजे भै सोकता कै जूफा कठिया मैं धरकै बाके मोहों से लगाईं।
30 जब ईसु बौ सिरका पी लई, और कही, “पूरो भौ!” और अपनो मूड़ झुकाए कै अपनी जान छोड़ दई।
31 तौ फिर यहूदि नेता पिलातुस से नहोरे करीं, कि उनकी टाँग तोड़ दई जाबै और उनके सव उतारे जामैं, ताकी साबत के दिन बे क्रूस मैं नाय रहमैं, काहैकि साबत को दिन बड़ो दिन रहै।
32 तौ फिर सिपईय्या आयकै बे आदमिन मैं से पहले बारे आदमी की टाँग तोड़ीं फिर दुसरे की, जो ईसु के संग क्रूस मैं चढ़ाय गै रहैं;
33 फिरौंकी बे जब ईसु के झोने आयकै देखीं कि बौ मर चुको है, तौ बाकी टाँग कै नाय तोड़ीं।
34 लेकिन सिपईय्यन मैं से एक जनी बाकै बरछी से पुसरिया मैं छेद दई, और बामै से तुरंत खून और पानी निकरो।
35 जो जौ देखी, बहे जौ गभाई दई है, और बाकी गभाई सच्ची है; और बौ जानथै, कि सच्ची कहथै कि तुम बिस्वास करौ।
36 काहैकि जे बात जहे ताहीं भईं कि पवित्र सास्त्र की बात पूरी होबै, “और बाकी कोई हड्डी तोड़ी नाय जागी।”
37 फिर एक और सास्त्र जौ कहथै, “जोकै बे छेदी रहैं, बाके घाँईं देखंगे।”
38 जे बातन के बाद अरिमतियाह को यूसुफ, जो ईसु को चेला रहै (काहैकि यहूदियो के डर के मारे जौ बात कै बतात नाय रहै) पिलातुस से नहोरे करी, कि मैं ईसु के सव कै लै जामौं, और पिलातुस बाके नहोरे कै सुन लई, और बौ आए कै बाकी लास कै लैगौ।
39 नीकुदेमुस जो पहली बार रात मैं ईसु से मिलन कै गौ रहै, युसुफ के संग लोबान और एलबा से बनाओ गौ तीस किलो महाकनबारी चीज, लैकै गै।
40 तौ बे ईसु के सव कै लईं और यहूदियन की गाड़न के नियम के अनुसार महाकनबारी चीज और लोहबान के संग कफन के लत्ता मैं लपेट दईं।
41 बौ जघा जितै पर ईसु कै क्रूस मैं लटकाईं रहैं, हुँआँ एक बारी रहै; और बौ बारी मैं एक कबर रहै; जामैं कभी कोई नाय रखो गौ रहै।
42 काहैकि जौ यहूदियन के साबत के एक दिन पहले को रहै और कबर झोने होन के बजह से ईसु की सरीर कै हूँनै रख दईं।