1 ⲉⲡϫⲱⲕ ⲉⲃⲟⲗ ⲡⲉⲯⲁⲗⲙⲟⲥ ⲛⲇⲁⲩⲉⲓⲇ ⲡⲛⲟⲩⲧⲉ ⲡⲛⲟⲩⲧⲉ ⲁⲓⲛⲁϩⲧⲉ ⲉⲣⲟⲕ ⲙⲡⲣⲧⲣⲁϫⲓϣⲓⲡⲉ ϣⲁ ⲉⲛⲉϩ</ab>
2 ⲙⲁⲧⲟⲩϫⲟⲓ ϩⲛ ⲧⲉⲕⲇⲓⲕⲁⲓⲟⲥⲩⲛⲏ ⲁⲩⲱ ⲛⲅⲛⲁϩⲙⲉⲧ ⲣⲓⲕⲉ ⲙⲡⲉⲕⲙⲁⲁϫⲉ ⲉⲣⲟⲓ ⲛⲅⲧⲟⲩϫⲟⲓ</ab>
3 ϣⲱⲡⲉ ⲛⲁⲓ ⲉⲩⲛⲟⲩⲧⲉ ⲛⲛⲁϣⲧⲉ ⲁⲩⲱ ⲉⲩⲙⲁ ⲉϥⲧⲁϫⲣⲏⲩ ⲉⲧⲟⲩϫⲟⲓ ϫⲉ ⲛⲧⲟⲕ ⲡⲉ ⲡⲁⲧⲁϫⲣⲟ ⲁⲩⲱ ⲡⲁⲙⲁ ⲙⲡⲱⲧ</ab>
4 ⲡⲁⲛⲟⲩⲧⲉ ⲙⲁⲧⲟⲩϫⲟⲓ ⲉⲧϭⲓϫ ⲙⲡⲣⲉϥⲣⲛⲟⲃⲉ ⲉⲃⲟⲗ ϩⲛ ⲧϭⲓϫ ⲙⲡⲡⲁⲣⲁⲛⲟⲙⲟⲥ ⲙⲛ ⲡⲁⲥⲉⲃⲏⲥ</ab>
5 ϫⲉ ⲛⲧⲟⲕ ⲡϫⲟⲉⲓⲥ ⲡⲉ ⲧⲁϩⲩⲡⲟⲙⲟⲛⲏ ⲡϫⲟⲉⲓⲥ ⲛⲧⲕ ⲧⲁϩⲉⲗⲡⲓⲥ ϫⲓⲛ ⲧⲁⲙⲛⲧⲕⲟⲩⲓ</ab>
6 ⲁⲓⲧⲁϫⲣⲟⲓ ⲉϫⲱⲕ ϫⲓⲛ ⲉⲓ ϩⲛ ⲑⲏ ⲛⲧⲟⲕ ⲁⲕⲛⲧ ⲉⲃⲟⲗ ϩⲛ ϩⲏⲧⲥ ⲛⲧⲁⲙⲁⲁⲩ ⲉⲣⲉⲡⲁⲣⲡⲙⲉⲉⲩⲉ ⲛϩⲏⲧⲕ ⲛⲟⲩⲟⲉⲓϣ ⲛⲓⲙ</ab>
7 ⲁⲓϣⲱⲡⲉ ⲛⲑⲉ ⲛⲛⲓϩⲛⲉ ⲛⲟⲩⲙⲏⲏϣⲉ ⲛⲧⲟⲕ ⲡⲉ ⲡⲁⲃⲟⲏⲑⲟⲥ ⲁⲩⲱ ⲡⲁⲧⲁϫⲣⲟ ⲛⲧⲕ ⲡⲁⲥⲱⲧⲏⲣ ⲡϫⲟⲉⲓⲥ</ab>
8 ⲁⲧⲁⲧⲁⲡⲣⲟ ⲙⲟⲩϩ ⲛⲥⲙⲟⲩ ϫⲉⲕⲁⲥ ϩⲙ ⲡⲉϩⲟⲟⲩ ⲧⲏⲣϥ ⲉⲓⲉⲥⲙⲟⲩ ⲉⲡⲉⲟⲟⲩ ⲛⲧⲉⲕⲙⲛⲧⲛⲟϭ</ab>
9 ⲙⲡⲣⲛⲟϫⲧ ⲉⲃⲟⲗ ⲉⲩⲟⲩⲟⲉⲓϣ ⲙⲙⲛⲧϩⲗⲗⲟ ϩⲙ ⲡⲧⲣⲉⲧⲁⲯⲩⲭⲏ ⲱϫⲛ ⲙⲡⲣⲕⲁⲁⲧ ⲛⲥⲱⲕ</ab>
10 ϫⲉ ⲁⲛⲁϫⲓϫⲉⲉⲩⲉ ϫⲉ ⲡⲉⲑⲟⲟⲩ ⲉⲣⲟⲓ ⲁⲩⲱ ⲛⲉⲧϩⲁⲣⲉϩ ⲉⲧⲁⲯⲩⲭⲏ ⲁⲩϫⲓϣⲟϫⲛⲉ ⲉⲧⲁⲯⲩⲭⲏ ⲉⲩϫⲱ ⲙⲙⲟⲥ ϩⲓ ⲟⲩⲥⲟⲡ</ab>
11 ϫⲉ ⲁⲡⲛⲟⲩⲧⲉ ⲕⲁⲁϥ ⲛⲥⲱϥ ⲡⲱⲧ ⲛⲧⲉⲧⲛⲧⲁϩⲟϥ ϫⲉ ⲙⲛ ⲡⲉⲧⲛⲁⲛⲁϩⲙⲉϥ</ab>
12 ⲡⲁⲛⲟⲩⲧⲉ ⲙⲡⲣⲟⲩⲉ ⲛⲥⲁⲃⲟⲗ ⲙⲙⲟⲓ ⲡⲁⲛⲟⲩⲧⲉ ϯϩⲧⲏⲕ ⲉⲧⲃⲟⲏⲑⲓⲁ</ab>
13 ⲙⲁⲣⲟⲩϫⲓϣⲓⲡⲉ ⲛⲥⲉⲱϫⲛ ⲛϭⲓ ⲛⲉⲧⲇⲓⲁⲃⲁⲗⲉ ⲛⲧⲁⲯⲩⲭⲏ ⲙⲁⲣⲟⲩϭⲟⲟⲗⲟⲩ ⲛⲟⲩϣⲓⲡⲉ ⲙⲛ ⲟⲩⲱⲱⲗⲥ ⲛϭⲓ ⲛⲉⲧϣⲓⲛⲉ ⲛⲥⲁ ϩⲉⲛⲡⲉⲑⲟⲟⲩ ⲉⲣⲟⲓ</ab>
14 ⲁⲛⲟⲕ ⲇⲉ ⲛⲟⲩⲟⲉⲓϣ ⲛⲓⲙ ϯⲛⲁⲛⲁϩⲧⲉ ⲉⲣⲟⲕ ⲡϫⲟⲉⲓⲥ ⲡⲁⲛⲟⲩⲧⲉ ⲁⲩⲱ ϯⲛⲁⲟⲩⲱϩ ⲉϫⲙ ⲡⲉⲕⲥⲙⲟⲩ</ab>
15 ⲧⲁⲧⲁⲡⲣⲟ ⲛⲁϫⲱ ⲛⲧⲉⲕⲇⲓⲕⲁⲓⲟⲥⲩⲛⲏ ⲙⲛ ⲡⲉⲕⲟⲩϫⲁⲓ ⲙⲡⲉϩⲟⲟⲩ ⲧⲏⲣϥ ϫⲉ ⲙⲡⲓⲥⲟⲩⲛ ⲛϩⲁⲧⲃⲉⲥ</ab>
16 ϯⲛⲏⲩ ⲉϩⲟⲩⲛ ϩⲛ ⲧⲉⲕϭⲟⲙ ⲡϫⲟⲉⲓⲥ ⲡⲛⲟⲩⲧⲉ ϯⲛⲁⲣⲡⲙⲉⲉⲩⲉ ⲛⲧⲉⲕⲇⲓⲕⲁⲓⲟⲥⲩⲛⲏ ⲙⲁⲩⲁⲁⲕ</ab>
17 ⲡⲛⲟⲩⲧⲉ ⲁⲕⲧⲥⲁⲃⲟⲓ ϫⲓⲛ ⲧⲁⲙⲛⲧⲕⲟⲩⲓ ⲁⲩⲱ ϣⲁ ⲧⲉⲛⲟⲩ ϯⲛⲁϫⲱ ⲛⲛⲉⲕϣⲡⲏⲣⲉ</ab>
18 ⲁⲩⲱ ϣⲁ ⲧⲁⲙⲛⲧϩⲗⲗⲟ ⲙⲛ ⲧⲁⲙⲛⲧⲛⲟϭ ⲡⲛⲟⲩⲧⲉ ⲙⲡⲣⲕⲁⲁⲧ ⲛⲥⲱⲕ ϣⲁⲛϯϫⲱ ⲙⲡⲉⲕϭⲃⲟⲓ ⲛⲧⲅⲉⲛⲉⲁ ⲧⲏⲣⲥ ⲉⲧⲛⲏⲩ</ab>
19 ⲧⲉⲕϭⲟⲙ ⲙⲛ ⲧⲉⲕⲇⲓⲕⲁⲓⲟⲥⲩⲛⲏ ⲡⲛⲟⲩⲧⲉ ϣⲁ ⲛⲉⲧϫⲟⲥⲉ ⲙⲙⲛⲧⲛⲟϭ ⲛⲧⲁⲕⲕⲁⲩ ⲡⲛⲟⲩⲧⲉ ⲛⲓⲙ ⲡⲉⲧⲛⲁϣⲓⲛⲉ ⲙⲙⲟⲕ</ab>
20 ⲛⲉⲑⲗⲓⲯⲓⲥ ⲛⲧⲁⲕⲧⲥⲁⲃⲟⲓ ⲉⲣⲟⲟⲩ ⲛϩⲁϩ ⲛⲥⲟⲡ ⲙⲛ ⲙⲡⲉⲑⲟⲟⲩ ⲁⲩⲱ ⲁⲕⲕⲟⲧⲕ ⲁⲕⲧⲁⲛϩⲟⲓ ⲁⲕⲛⲧ ⲉϩⲣⲁⲓ ϩⲛ ⲛⲛⲟⲩⲛ ⲙⲡⲕⲁϩ</ab>
21 ⲁⲕⲧⲁϣⲉⲧⲉⲕⲙⲛⲧⲛⲟϭ ⲉϩⲣⲁⲓ ⲉϫⲱⲓ ⲁⲩⲱ ⲁⲕⲕⲟⲧⲕ ⲁⲕⲡⲁⲣⲁⲕⲁⲗⲉⲓ ⲙⲙⲟⲓ</ab>
22 ⲕⲁⲓ ⲅⲁⲣ ⲁⲛⲟⲕ ⲡϫⲟⲉⲓⲥ ⲡⲁⲛⲟⲩⲧⲉ ϯⲛⲁⲟⲩⲱⲛϩ ⲉⲃⲟⲗ ⲛⲧⲉⲕⲙⲉ ϩⲛ ⲛⲓⲗⲁⲟⲥ ϯⲛⲁⲯⲁⲗⲗⲉⲓ ⲉⲣⲟⲕ ϩⲛ ⲟⲩⲕⲓⲑⲁⲣⲁ ⲡⲉⲧⲟⲩⲁⲁⲃ ⲙⲡⲓ︤ⲏ︦ⲗ︥</ab>
23 ⲥⲉⲛⲁⲧⲉⲗⲏⲗ ⲛϭⲓ ⲛⲁⲥⲡⲟⲧⲟⲩ ⲉⲓϣⲁⲛⲯⲁⲗⲗⲉⲓ ⲉⲣⲟⲕ ⲁⲩⲱ ⲧⲁⲯⲩⲭⲏ ⲉⲛⲧⲁⲕⲥⲟⲧⲥ ⲉⲃⲟⲗ ϩⲛ ⲧϭⲓϫ ⲛⲛϫⲁϫⲉ</ab>
24 ⲉⲧⲓ ⲇⲉ ⲡⲁⲕⲉⲗⲁⲥ ⲛⲁⲙⲉⲗⲉⲧⲁ ⲛⲧⲉⲕⲇⲓⲕⲁⲓⲟⲥⲩⲛⲏ ⲙⲡⲉϩⲟⲟⲩ ⲧⲏⲣϥ ϩⲟⲧⲁⲛ ⲉⲩϣⲁⲛϫⲓϣⲓⲡⲉ ⲛⲥⲉⲟⲩⲱⲗⲥ ⲛϭⲓ ⲛⲉⲧϣⲓⲛⲉ ⲛⲥⲁ ϩⲉⲛⲡⲉⲑⲟⲟⲩ ⲉⲣⲟⲓ</ab>