1 ⲡⲉⲯⲁⲗⲙⲟⲥ ⲛⲁⲥⲁⲫ ⲡⲛⲟⲩⲧⲉ ⲛⲛⲛⲟⲩⲧⲉ ⲡϫⲟⲉⲓⲥ ⲁϥϣⲁϫⲉ ⲁⲩⲱ ⲁϥⲙⲟⲩⲧⲉ ⲉⲡⲕⲁϩ ⲉⲃⲟⲗ ϩⲛ ⲙⲙⲁ ⲛϣⲁ ⲙⲡⲣⲏ ϣⲁ ⲛⲉϥⲙⲁ ⲛϩⲱⲧⲡ</ab>
2 ⲉⲣⲉⲡⲁⲛⲁⲓ ⲙⲡⲉϥⲥⲁ ϣⲟⲟⲡ ϩⲛ ⲥⲓⲱⲛ ⲡⲛⲟⲩⲧⲉ ⲛⲏⲩ ϩⲛ ⲟⲩⲟⲩⲱⲛϩ ⲉⲃⲟⲗ ⲁⲩⲱ ⲡⲉⲛⲛⲟⲩⲧⲉ ⲛⲁⲕⲁⲣⲱϥ ⲁⲛ</ab>
3 ⲟⲩⲛⲟⲩⲕⲱϩⲧ ⲛⲁⲙⲟⲩϩ ⲙⲡⲉϥⲙⲧⲟ ⲉⲃⲟⲗ ⲁⲩⲱ ⲟⲩⲛⲟϭ ⲛϩⲁⲧⲏⲩ ϩⲙ ⲡⲉϥⲕⲱⲧⲉ</ab>
4 ϥⲛⲁⲙⲟⲩⲧⲉ ⲉⲧⲡⲉ ⲉϩⲣⲁⲓ ⲁⲩⲱ ⲡⲕⲁϩ ⲉⲃⲟⲗ ϩⲙ ⲡϫⲓⲥⲉ ⲉⲇⲓⲁⲕⲣⲓⲛⲉ ⲙⲡⲉϥⲗⲁⲟⲥ</ab>
5 ⲥⲱⲟⲩϩ ⲛⲁϥ ⲉϩⲟⲩⲛ ⲛⲉϥⲡⲉⲧⲟⲩⲁⲁⲃ ⲛⲉⲧⲥⲙⲓⲛⲉ ⲛⲧⲉϥⲇⲓⲁⲑⲏⲕⲏ ⲉϫⲛ ϩⲉⲛⲑⲩⲥⲓⲁ</ab>
6 ⲙⲡⲏⲩⲉ ⲛⲁϫⲱ ⲛⲧⲉϥⲇⲓⲕⲁⲓⲟⲥⲩⲛⲏ ⲁⲩⲱ ϩⲛ ⲑⲁⲏ ⲛⲛⲉϩⲟⲟⲩ ⲡⲛⲟⲩⲧⲉ ⲛⲁⲙⲉϣⲧ ⲑⲓ︤ⲗ︦ⲏ︥ⲙ ⲙⲛ ⲟⲩϩⲏⲃⲥ ϫⲉ ⲡⲛⲟⲩⲧⲉ ⲟⲩⲕⲣⲓⲧⲏⲥ ⲡⲉ ⲇⲓⲁⲯⲁⲗⲙⲁ</ab>
7 ⲥⲱⲧⲙ ⲡⲁⲗⲁⲟⲥ ⲧⲁϣⲁϫⲉ ⲛⲙⲙⲁⲕ ⲡⲓ︤ⲏ︦ⲗ︥ ⲧⲁⲣⲙⲛⲧⲣⲉ ⲛⲁⲕ ⲁⲛⲟⲕ ⲡⲉ ⲡⲛⲟⲩⲧⲉ ⲡⲉⲕⲛⲟⲩⲧⲉ</ab>
8 ⲛⲉⲓⲛⲁϫⲡⲓⲟⲕ ⲁⲛ ⲉϫⲛ ⲛⲉⲕⲑⲩⲥⲓⲁ ⲛⲉⲕϭⲗⲓⲗ ⲙⲡⲁⲙⲧⲟ ⲉⲃⲟⲗ ⲛⲟⲩⲟⲉⲓϣ ⲛⲓⲙ</ab>
9 ⲛⲛⲁϫⲓⲙⲁⲥⲉ ⲉⲃⲟⲗ ϩⲙ ⲡⲉⲕⲏⲓ ⲟⲩⲇⲉ ϭⲓⲉ ⲉⲃⲟⲗ ϩⲛ ⲛⲉⲕⲟϩⲉ</ab>
10 ϫⲉ ⲛⲟⲩⲓ ⲧⲏⲣⲟⲩ ⲛⲉ ⲛⲉⲑⲏⲣⲓⲟⲛ ⲙⲡⲉⲇⲣⲩⲙⲟⲥ ⲛⲧⲃⲛⲟⲟⲩⲉ ⲉⲧϩⲓ ⲛⲧⲟⲟⲩ ⲙⲛ ⲛⲉϩⲟⲟⲩ</ab>
11 ϯⲥⲟⲟⲩⲛ ⲛⲛϩⲁⲗⲁⲧⲉ ⲧⲏⲣⲟⲩ ⲛⲧⲡⲉ ⲁⲩⲱ ⲡⲥⲁ ⲛⲧⲥⲱϣⲉ ⲛⲙⲙⲁⲓ</ab>
12 ⲉⲓϣⲁⲛϩⲕⲟ ⲛⲛⲁϫⲟⲟⲥ ⲛⲁⲕ ⲧⲱⲓ ⲅⲁⲣ ⲧⲉ ⲧⲟⲓⲕⲟⲩⲙⲉⲛⲏ ⲙⲛ ⲡⲉⲥϫⲱⲕ ⲉⲃⲟⲗ</ab>
13 ⲙⲏ ⲉⲓⲛⲁⲟⲩⲉⲙⲁϥ ⲙⲙⲁⲥⲉ ⲏ ⲉⲓⲛⲁⲥⲉⲥⲛⲟϥ ⲛϭⲓⲉ</ab>
14 ϣⲱⲱⲧ ⲛⲛⲁϩⲣⲙ ⲡⲛⲟⲩⲧⲉ ⲛⲟⲩⲑⲩⲥⲓⲁ ⲛⲥⲙⲟⲩ ⲛⲅϯ ⲛⲛⲉⲕϣⲗⲏⲗ ⲙⲡⲉⲧϫⲟⲥⲉ</ab>
15 ⲛⲅⲉⲡⲓⲕⲁⲗⲉⲓ ⲙⲙⲟⲓ ϩⲙ ⲡⲉϩⲟⲟⲩ ⲛⲧⲉⲕⲑⲗⲓⲯⲓⲥ ⲁⲩⲱ ϯⲛⲁⲧⲟⲩϫⲟⲕ ⲛⲅϯⲉⲟⲟⲩ ⲛⲁⲓ ⲇⲓⲁⲯⲁⲗⲙⲁ</ab>
16 ⲡⲉϫⲉⲡⲛⲟⲩⲧⲉ ⲙⲡⲣⲉϥⲣⲛⲟⲃⲉ ϫⲉ ⲉⲧⲃⲉ ⲟⲩ ⲛⲧⲟⲕ ⲕϣⲁϫⲉ ϩⲛ ⲛⲁⲇⲓⲕⲁⲓⲱⲙⲁ ⲁⲩⲱ ⲕϫⲓ ⲛⲧⲁⲇⲓⲁⲑⲏⲕⲏ ϩⲓⲧⲛ ⲣⲱⲕ</ab>
17 ⲛⲧⲟⲕ ⲇⲉ ⲁⲕⲙⲉⲥⲧⲉⲧⲉⲥⲃⲱ ⲁⲩⲱ ⲁⲕⲛⲟⲩϫⲉ ⲛⲛⲁϣⲁϫⲉ ϩⲓ ⲡⲁϩⲟⲩ ⲙⲙⲟⲕ</ab>
18 ⲉⲕϣⲁⲛⲛⲁⲩ ⲉⲩⲣⲉϥϫⲓⲟⲩⲉ ⲛⲉⲕⲡⲏⲧ ⲛⲙⲙⲁϥ ⲁⲩⲱ ⲛⲉⲕⲕⲱ ⲛⲧⲉⲕⲧⲟ ⲙⲛ ⲛⲛⲟⲉⲓⲕ</ab>
19 ⲁⲧⲉⲕⲧⲁⲡⲣⲟ ⲧⲁϣⲉⲕⲁⲕⲓⲁ ⲁⲩⲱ ⲁⲡⲉⲕⲗⲁⲥ ϭⲗⲟⲙⲗⲙ ⲛⲟⲩϫⲓⲛϭⲟⲛⲥ</ab>
20 ⲛⲉⲕϩⲙⲟⲟⲥ ⲉⲕⲕⲁⲧⲁⲗⲁⲗⲉⲓ ⲛⲥⲁ ⲡⲉⲕⲥⲟⲛ ⲁⲩⲱ ⲛⲉⲕⲕⲁⲥⲕⲁⲛⲇⲁⲗⲟⲛ ⲛⲥⲁ ⲡϣⲏⲣⲉ ⲛⲧⲉⲕⲙⲁⲁⲩ</ab>
21 ⲁⲕⲣ ⲛⲁⲓ ⲁⲓⲕⲁⲣⲱⲓ ⲁⲕⲙⲉⲉⲩⲉ ⲉⲩⲁⲛⲟⲙⲓⲁ ϫⲉ ⲉⲓⲛⲁϣⲱⲡⲉ ⲛⲧⲉⲕϩⲉ ϯⲛⲁϫⲡⲓⲟⲕ ⲧⲁⲧⲁϩⲟⲟⲩ ⲉⲣⲁⲧⲟⲩ ⲙⲡⲉⲕⲙⲧⲟ ⲉⲃⲟⲗ</ab>
22 ⲉⲓⲙⲉ ϭⲉ ⲉⲛⲁⲓ ⲛⲉⲧⲣⲡⲱⲃϣ ⲙⲡⲛⲟⲩⲧⲉ ⲙⲏⲡⲟⲧⲉ ⲛϥⲧⲱⲣⲡ ⲛϥⲧⲙϣⲱⲡⲉ ⲛϭⲓ ⲡⲉⲧⲛⲟⲩϩⲙ</ab>
23 ⲟⲩⲑⲩⲥⲓⲁ ⲛⲥⲙⲟⲩ ⲧⲉⲧⲛⲁϯⲉⲟⲟⲩ ⲛⲁⲓ ⲁⲩⲱ ⲉⲣⲉⲧⲉϩⲓⲏ ⲙⲙⲁⲩ ⲉⲧⲟⲩⲁⲁⲃ ⲉϯⲛⲁⲧⲥⲁⲃⲟⲕ ⲉⲣⲟⲥ ⲡⲟⲩϫⲁⲓ ⲙⲡⲛⲟⲩⲧⲉ</ab>