1 ⲁⲗⲗⲏⲗⲟⲩⲓⲁ ⲧⲉⲭⲟⲣⲉⲓⲁ ϩⲙ ⲡⲉⲓ ⲉⲃⲟⲗ ⲙⲡⲓ︤ⲏ︦ⲗ︥ ϩⲛ ⲕⲏⲙⲉ ⲡⲏⲓ ⲛⲓⲁⲕⲱⲃ ⲉⲃⲟⲗ ϩⲙ ⲡⲗⲁⲟⲥ ⲛⲃⲁⲣⲃⲁⲣⲟⲥ</ab>
2 ⲁϯⲟⲩⲇⲁⲓⲁ ϣⲱⲡⲉ ⲛⲁϥ ⲛⲧⲃⲃⲟ ⲁⲡⲓ︤ⲏ︦ⲗ︥ ⲣϫⲟⲉⲓⲥ ⲉⲣⲟⲥ</ab>
3 ⲁⲑⲁⲗⲁⲥⲥⲁ ⲛⲁⲩ ⲁⲥⲡⲱⲧ ⲁⲡⲓⲟⲣⲇⲁⲛⲏⲥ ⲕⲟⲧϥ ⲉⲡⲁϩⲟⲩ</ab>
4 ⲁⲛⲧⲟⲟⲩ ⲥⲛⲁⲉⲓⲛ ⲛⲑⲉ ⲛⲛⲟⲉⲓⲗⲉ ⲁⲩⲱ ⲛⲥⲓⲃⲧ ⲛⲑⲉ ⲛϩⲉⲛϩⲓⲉⲓⲃ ⲛⲉⲥⲟⲟⲩ</ab>
5 ⲁϩⲣⲟ ⲑⲁⲗⲁⲥⲥⲁ ϫⲉ ⲁⲡⲱⲧ ⲁⲩⲱ ⲛⲧⲟⲕ ⲡⲓⲟⲣⲇⲁⲛⲏⲥ ϫⲉ ⲁⲕⲕⲟⲧⲕ ⲉⲡⲁϩⲟⲩ</ab>
6 ⲛⲧⲟⲟⲩ ϫⲉ ⲁⲧⲉⲧⲛⲥⲕⲓⲣⲧⲁ ⲛⲑⲉ ⲛⲛⲟⲉⲓⲗⲉ ⲁⲩⲱ ⲛⲥⲓⲃⲧ ⲛⲑⲉ ⲛϩⲉⲛϩⲓⲉⲓⲃ ⲛⲉⲥⲟⲟⲩ</ab>
7 ⲁⲡⲕⲁϩ ⲕⲓⲙ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲙⲡⲉⲙⲧⲟ ⲉⲃⲟⲗ ⲙⲡⲛⲟⲩⲧⲉ ⲛⲓⲁⲕⲱⲃ</ab>
8 ⲡⲉⲛⲧⲁϥⲕⲧⲟ ⲛⲧⲡⲉⲧⲣⲁ ⲉϩⲉⲛⲛⲟⲩⲧ ⲙⲙⲟⲟⲩ ⲁⲩⲱ ϯⲱⲛⲉ ⲉⲧⲛⲁϣⲧⲉ ϩⲉⲛⲡⲏⲅⲏ ⲙⲙⲟⲟⲩ</ab>
9 ⲙⲡⲱⲣ ⲉⲣⲟⲛ ⲡϫⲟⲉⲓⲥ ⲙⲡⲱⲣ ⲉⲣⲟⲛ ⲁⲗⲗⲁ ϯⲉⲟⲟⲩ ⲙⲡⲉⲕⲣⲁⲛ ⲉϩⲣⲁⲓ ⲉϫⲙ ⲡⲉⲕⲛⲁ ⲙⲛ ⲧⲉⲕⲙⲉ</ab>
10 ⲙⲏⲡⲟⲧⲉ ⲛⲧⲉⲛϩⲉⲑⲛⲟⲥ ϫⲟⲟⲥ ϫⲉ ⲉϥⲧⲱⲛ ⲡⲉⲩⲛⲟⲩⲧⲉ</ab>
11 ⲡⲉⲛⲛⲟⲩⲧⲉ ⲇⲉ ⲉϩⲣⲁⲓ ϩⲛ ⲙⲡⲏⲩⲉ ⲁⲩⲱ ϩⲓϫⲙ ⲡⲕⲁϩ ⲡⲉⲧϥⲟⲩⲁϣϥ ⲧⲏⲣϥ ⲁϥⲁⲁϥ ⲁⲗⲗⲏⲗⲟⲩⲓⲁ</ab>
12 ⲛⲉⲓⲇⲱⲗⲟⲛ ⲛⲛϩⲉⲑⲛⲟⲥ ϩⲉⲛϩⲁⲧ ⲛⲉ ϩⲓ ⲛⲟⲩⲃ ϩⲉⲛϩⲃⲏⲩⲉ ⲛⲉⲛϭⲓϫ ⲛⲣⲱⲙⲉ</ab>
13 ⲟⲩⲛⲃⲁⲗ ⲙⲙⲟⲟⲩ ⲛⲥⲉⲛⲁⲩ ⲉⲃⲟⲗ ⲁⲛ</ab>
14 ⲟⲩⲛⲙⲁⲁϫⲉ ⲙⲙⲟⲩ ⲛⲥⲉⲥⲱⲧⲙ ⲁⲛ ⲟⲩⲛⲧⲁⲡⲣⲟ ⲙⲙⲟⲟⲩ ⲛⲛⲉⲩϣⲁϫⲉ ϣⲁⲁⲛⲧⲟⲩ ⲙⲙⲟⲟⲩ ⲛⲛⲉⲩϣⲱⲗⲙ</ab>
15 ⲛⲉⲩϭⲓϫ ⲙⲙⲟⲟⲩ ⲛⲛⲉⲩϭⲟⲙϭⲙ ⲛⲉⲩⲟⲩⲉⲣⲏⲧⲉ ⲙⲙⲟⲟⲩ ⲛⲛⲉⲩⲙⲟⲟϣⲉ ⲛⲛⲉⲩⲙⲟⲩⲧⲉ ϩⲛ ⲧⲉⲩϣⲟⲩⲱⲃⲉ ⲙⲛⲡ︤ⲛ︦ⲁ︥ ⲅⲁⲣ ϩⲛ ⲣⲱⲟⲩ</ab>
16 ⲉⲩⲉⲣⲧⲉⲩϩⲉ ⲛϭⲓ ⲛⲉⲛⲧⲁⲩⲧⲁⲙⲓⲟⲟⲩ ⲙⲛ ⲟⲩⲟⲛ ⲛⲓⲙ ⲉⲧⲛⲁϩⲧⲉ ⲉⲣⲟⲟⲩ</ab>
17 ⲡⲏⲓ ⲙⲡⲓ︤ⲏ︦ⲗ︥ ⲁϥϩⲉⲗⲡⲓⲍⲉ ⲉⲡϫⲟⲉⲓⲥ ⲡⲉⲩⲃⲟⲏⲑⲟⲥ ⲡⲉ ⲁⲩⲱ ⲧⲉⲩⲛⲁϣⲧⲉ ⲡⲉ</ab>
18 ⲡⲏⲓ ⲛⲁⲁⲣⲱⲛ ⲁϥϩⲉⲗⲡⲓⲍⲉ ⲉⲡϫⲟⲉⲓⲥ ⲡⲉⲩⲃⲟⲏⲑⲟⲥ ⲡⲉ ⲁⲩⲱ ⲧⲉⲩⲛⲁϣⲧⲉ ⲡⲉ</ab>
19 ⲛⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ⲁⲩϩⲉⲗⲡⲓⲍⲉ ⲉⲡϫⲟⲉⲓⲥ ⲡⲉⲩⲃⲟⲏⲑⲟⲥ ⲡⲉ ⲁⲩⲱ ⲧⲉⲩⲛⲁϣⲧⲉ ⲡⲉ</ab>
20 ⲁⲡϫⲟⲉⲓⲥ ⲣⲡⲉⲛⲙⲉⲉⲩⲉ ⲁϥⲥⲙⲟⲩ ⲉⲣⲟⲛ ⲉϥⲉⲥⲙⲟⲩ ⲉⲡⲏⲓ ⲙⲡⲓ︤ⲏ︦ⲗ︥ ⲉϥⲉⲥⲙⲟⲩ ⲉⲡⲏⲓ ⲛⲁⲁⲣⲱⲛ</ab>
21 ⲉϥⲉⲥⲙⲟⲩ ⲉⲟⲩⲟⲛ ⲛⲓⲙ ⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ⲛⲕⲟⲩⲓ ⲙⲛ ⲛⲛⲟϭ</ab>
22 ⲡϫⲟⲉⲓⲥ ⲉϥⲉⲟⲩⲱϩ ⲉⲣⲟⲛ ⲙⲛ ⲛⲉⲛϣⲏⲣⲉ</ab>
23 ⲧⲛⲥⲙⲁⲙⲁⲁⲧ ⲁⲛⲟⲛ ⲙⲡϫⲟⲉⲓⲥ ⲡⲉⲛⲧⲁϥⲧⲁⲙⲓⲉⲧⲡⲉ ⲙⲛ ⲡⲕⲁϩ</ab>
24 ⲧⲡⲉ ⲛⲧⲡⲉ ⲧⲁⲡϫⲟⲉⲓⲥ ⲧⲉ ⲁϥϯⲡⲕⲁϩ ⲇⲉ ⲛⲛϣⲏⲣⲉ ⲛⲛⲣⲱⲙⲉ</ab>
25 ⲛⲉⲧⲙⲟⲟⲩⲧ ⲁⲛ ⲛⲉⲧⲛⲁⲥⲙⲟⲩ ⲉⲣⲟⲕ ⲡϫⲟⲉⲓⲥ ⲟⲩⲇⲉ ⲟⲩⲟⲛ ⲛⲓⲙ ⲁⲛ ⲉⲧⲃⲏⲕ ⲉⲡⲉⲥⲏⲧ ⲉⲁⲙⲛⲧⲉ</ab>
26 ⲁⲗⲗⲁ ⲁⲛⲟⲛ ⲛⲉⲧⲟⲛϩ ⲛⲉⲧⲛⲁⲥⲙⲟⲩ ⲉⲡϫⲟⲉⲓⲥ ϫⲓⲛ ⲧⲉⲛⲟⲩ ϣⲁ ⲉⲛⲉϩ</ab>