1 ⲁⲩⲱ ⲁⲥϣⲱⲡⲉ ⲛⲧⲉⲣⲉⲓⲉⲣⲉⲙⲓⲁⲥ ⲟⲩⲱ ⲉϥϫⲱ ⲛⲛⲉⲓϣⲁϫⲉ ⲧⲏⲣⲟⲩ ⲛⲧⲉ ⲡϫⲟⲉⲓⲥ ⲛⲛⲁϩⲣⲛ ⲡⲗⲁⲟⲥ ⲧⲏⲣϥ ⲛⲁⲓ ⲉⲛⲧⲁⲡϫⲟⲉⲓⲥ ⲧⲛⲛⲟⲟⲩⲥⲉ ⲛⲁⲩ</ab>
2 ⲡⲉϫⲉⲁⲍⲁⲣⲓⲁⲥ ⲡϣⲏⲣⲉ ⲛⲁⲙⲁⲥⲁⲓⲟⲥ ⲙⲛ ⲓⲱⲁⲛⲁⲛ ⲡϣⲏⲣⲉ ⲛⲕⲁⲣⲏⲉ ⲙⲛ ⲛⲣⲱⲙⲉ ⲧⲏⲣⲟⲩ ⲉⲩϫⲱ ⲙⲙⲟⲥ ⲛⲓⲉⲣⲉⲙⲓⲁⲥ ϫⲉ ⲉⲕϫⲓ ϭⲟⲗ ⲛⲧⲟⲕ ⲙⲡⲉⲡϫⲟⲉⲓⲥ ⲧⲛⲛⲟⲟⲩⲕ ϣⲁⲣⲟⲛ ⲉⲕϫⲱ ⲙⲙⲟⲥ ϫⲉ ⲙⲡⲣⲃⲱⲕ ⲉϩⲣⲁⲓ ⲉⲕⲏⲙⲉ ⲉⲩⲱϩ ⲙⲙⲁⲩ</ab>
3 ⲁⲗⲗⲁ ⲃⲁⲣⲟⲩⲭ ⲡϣⲏⲣⲉ ⲛⲛⲏⲣⲓⲁⲥ ⲡⲉⲧⲧⲣⲉⲕϫⲱ ⲛⲛⲁⲓ ⲛⲁⲛ ϫⲉⲕⲁⲥ ⲉⲕⲉⲧⲁⲁⲛ ⲉϩⲣⲁⲓ ⲉⲛϭⲓϫ ⲛⲛⲉⲭⲁⲗⲇⲁⲓⲟⲥ ⲛⲥⲉⲙⲟⲩⲟⲩⲧ ⲙⲙⲟⲛ</ab>
4 ⲁⲩⲱ ⲙⲡϥⲥⲱⲧⲙ ⲛϭⲓ ⲓⲱⲁⲛⲁⲛ ⲙⲛ ⲛϩⲏⲅⲉⲙⲱⲛ ⲧⲏⲣⲟⲩ ⲛⲧϭⲟⲙ ⲙⲛ ⲡⲗⲁⲟⲥ ⲧⲏⲣϥ ⲉⲡⲉϩⲣⲟⲟⲩ ⲙⲡϫⲟⲉⲓⲥ ⲉⲧⲣⲉⲩϣⲱⲡⲉ ϩⲙ ⲡⲕⲁϩ ⲛⲓⲟⲩⲇⲁ</ab>
5 ⲁϥϫⲓ ϭⲉ ⲛⲓⲱⲁⲛⲁⲛ ⲙⲛ ⲛϩⲏⲅⲉⲙⲱⲛ ⲧⲏⲣⲟⲩ ⲛⲧϭⲟⲙ ⲙⲛ ⲡⲕⲉϣⲱϫⲡ ⲧⲏⲣϥ ⲛⲓⲟⲩⲇⲁ ⲛⲉⲛⲧⲁⲩⲕⲧⲟⲟⲩ ⲉⲃⲟⲗ ⲉⲧⲙⲧⲣⲉⲩⲟⲩⲱϩ ϩⲙ ⲡⲕⲁϩ</ab>
6 ⲛⲣⲱⲙⲉ ⲙⲛ ⲛⲉϩⲓⲟⲙⲉ ⲙⲛ ⲛϣⲏⲣⲉ ⲕⲟⲩⲓ ⲙⲛ ⲛϣⲉⲉⲣⲉ ⲙⲡⲣⲣⲟ ⲙⲛ ⲛⲉⲯⲩⲭⲏ ⲉⲛⲧⲁϥϣⲟϫⲡⲟⲩ ⲉⲡⲁϩⲟⲩ ⲛϭⲓ ⲛⲁⲃⲟⲩⲍⲁⲣⲇⲁⲛ ϩⲁϩⲧⲉ ⲅⲟⲇⲟⲗⲓⲁⲥ ⲡϣⲏⲣⲉ ⲛⲁⲭⲓⲕⲁⲙ ⲁⲩⲱ ⲓⲉⲣⲉⲙⲓⲁⲥ ⲡⲉⲡⲣⲟⲫⲏⲧⲏⲥ ⲙⲛ ⲃⲁⲣⲟⲩⲭ ⲡϣⲏⲣⲉ ⲛⲛⲏⲣⲓⲁⲥ</ab>
7 ⲁⲩⲃⲱⲕ ⲉϩⲣⲁⲓ ⲉⲡⲕⲁϩ ⲛⲕⲏⲙⲉ ⲉⲧⲃⲉ ϫⲉ ⲙⲡⲟⲩⲥⲱⲧⲙ ⲛⲥⲁ ⲡⲉϩⲣⲟⲟⲩ ⲙⲡϫⲟⲉⲓⲥ ⲁⲩⲉⲓ ⲉϩⲣⲁⲓ ⲉⲧⲁⲫⲛⲁⲥ</ab>
8 ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁ ⲓⲉⲣⲉⲙⲓⲁⲥ ϩⲛ ⲧⲁⲫⲛⲁⲥ ⲉϥϫⲱ ⲙⲙⲟⲥ</ab>
9 ϫⲉ ϫⲓ ⲛⲁⲕ ⲛϩⲉⲛⲛⲟϭ ⲛⲱⲛⲉ ⲛⲅϩⲟⲡⲟⲩ ϩⲓⲣⲛ ⲛⲣⲟ ⲛⲧⲡⲩⲗⲏ ⲙⲡⲏⲓ ⲙⲫⲁⲣⲁⲱ ϩⲛ ⲧⲁⲫⲛⲁⲥ ⲙⲡⲉⲙⲧⲟ ⲉⲃⲟⲗ ⲛⲣⲣⲱⲙⲉ ⲛⲓⲟⲩⲇⲁ</ab>
10 ⲁⲩⲱ ⲉⲕⲉϫⲟⲟⲥ ⲛⲁⲩ ϫⲉ ⲧⲁⲓ ⲧⲉ ⲑⲉ ⲉⲛⲧⲁⲡϫⲟⲉⲓⲥ ϫⲟⲟⲥ ϫⲉ ⲉⲓⲥ ϩⲏⲏⲧⲉ ⲁⲛⲟⲕ ϯⲛⲁϫⲟⲟⲩ ⲛⲧⲁⲉⲓⲛⲉ ⲛⲛⲁⲃⲟⲩⲭⲟⲇⲟⲛⲟⲥⲟⲣ ⲡⲣⲣⲟ ⲛⲧⲃⲁⲃⲩⲗⲱⲛ ⲛϥⲕⲱ ⲙⲡⲉϥⲑⲣⲟⲛⲟⲥ ϩⲓϫⲛ ⲛⲉⲓⲱⲛⲉ ⲛⲁⲓ ⲉⲛⲧⲁⲕϩⲟⲡⲟⲩ ⲁⲩⲱ ϥⲛⲁϥⲓ ⲛⲛⲉϥϩⲟⲡⲗⲟⲛ</ab>
11 ⲛϥⲉⲓ ⲉϩⲟⲩⲛ ⲛϥⲡⲁⲧⲁⲥⲥⲉ ⲙⲡⲕⲁϩ ⲛⲕⲏⲙⲉ ⲛⲉⲧⲧⲏϣ ⲉⲡⲙⲟⲩ ⲉϩⲣⲁⲓ ⲉⲡⲙⲟⲩ ⲁⲩⲱ ⲛⲉⲧⲧⲏϣ ⲉⲡⲡⲱⲱⲛⲉ ⲉⲃⲟⲗ ⲉⲩⲡⲱⲱⲛⲉ ⲉⲃⲟⲗ ⲁⲩⲱ ⲛⲉⲧⲧⲏϣ ⲉⲧⲥⲏϥⲉ ⲉⲧⲟⲟⲧⲥ ⲛⲧⲥⲏϥⲉ</ab>
12 ⲁⲩⲱ ⲛϥϫⲉⲣⲱ ⲛⲟⲩⲕⲱϩⲧ ϩⲛ ⲛⲏⲓ ⲛⲛⲉϥⲛⲟⲩⲧⲉ ⲛϥⲣⲱⲕϩ ⲙⲙⲟⲟⲩ ⲁⲩⲱ ⲛϥⲡⲟⲟⲛⲟⲩ ⲉⲃⲟⲗ ⲛϥⲙⲉϣⲧ ⲡⲕⲁϩ ⲛⲕⲏⲙⲉ ⲛⲑⲉ ⲛⲟⲩϣⲱⲥ ⲉϣⲁϥⲕⲱⲧϥ ⲛⲧⲉϥϣⲧⲏⲛ ⲁⲩⲱ ϥⲛⲏⲩ ⲉⲃⲟⲗ ϩⲛ ⲟⲩⲉⲓⲣⲏⲛⲏ</ab>
13 ⲛϥⲟⲩⲱϣϥ ⲛⲛⲉⲥⲧⲩⲗⲟⲥ ⲛⲧⲡⲟⲗⲓⲥ ⲙⲡⲣⲏ ⲉⲧⲉⲱⲛ ⲧⲉ ⲁⲩⲱ ⲛⲉⲩⲏⲓ ϥⲛⲁⲣⲟⲕϩⲟⲩ ϩⲛ ⲟⲩⲕⲱϩⲧ</ab>