1 ⲛⲉⲧⲟⲃⲉ ⲃⲱⲕ ⲛⲏⲧⲛ ⲛⲥⲁ ⲙⲟⲟⲩ ⲁⲩⲱ ⲛⲉⲧⲉⲙⲛⲧⲟⲩϩⲟⲙⲛⲧ ⲃⲱⲕ ϣⲱⲡ ⲛⲏⲧⲛ ⲁⲩⲱ ⲛⲧⲉⲧⲛⲟⲩⲱⲙ ⲛⲧⲉⲧⲛⲥⲱ ⲁϫⲛ ϩⲟⲙⲛⲧ ϩⲓ ⲁⲥⲟⲩ ⲛⲏⲣⲡ ⲙⲛ ⲟⲩⲱⲧ</ab>
2 ⲉⲧⲃⲉ ⲟⲩ ⲧⲉⲧⲛⲛⲁϣⲱⲡ ϩⲁ ϩⲟⲙⲛⲧ ⲁⲩⲱ ⲡⲉⲧⲛϩⲓⲥⲉ ϣⲟⲟⲡ ⲉⲩⲥⲓ ⲥⲱⲧⲙ ⲉⲣⲟⲓ ⲛⲧⲉⲧⲛⲟⲩⲱⲙ ⲛⲛⲁⲅⲁⲑⲟⲛ ⲁⲩⲱ ⲛⲧⲉⲧⲛⲯⲩⲭⲏ ⲥⲁⲁⲛϣ ϩⲛ ϩⲉⲛⲁⲅⲁⲑⲟⲛ</ab>
3 ϯ ϩⲧⲏⲧⲛ ϩⲛ ⲛⲉⲧⲛⲙⲁⲁϫⲉ ⲁⲩⲱ ⲛⲧⲉⲧⲛⲟⲩⲉϩⲧⲏⲩⲧⲛ ⲛⲥⲁ ⲛⲁϩⲓⲟⲟⲩⲉ ⲥⲱⲧⲙ ⲉⲣⲟⲓ ⲧⲁⲣⲉⲧⲉⲧⲛⲯⲩⲭⲏ ⲱⲛϩ ϩⲛ ϩⲉⲛⲁⲅⲁⲑⲟⲛ ⲁⲩⲱ ϯⲛⲁⲥⲙⲓⲛⲉ ⲛⲙⲙⲏⲧⲛ ⲛⲟⲩⲇⲓⲁⲑⲏⲕⲏ ⲛϣⲁ ⲉⲛⲉϩ ⲛⲉⲧⲟⲩⲁⲁⲃ ⲛⲇⲁⲩⲉⲓⲇ ⲉⲧⲛϩⲟⲧ</ab>
4 ⲉⲓⲥ ϩⲏⲏⲧⲉ ⲁⲓϯ ⲙⲙⲟϥ ⲙⲙⲛⲧⲣⲉ ⲛⲛϩⲉⲑⲛⲟⲥ ⲁⲩⲱ ⲛⲁⲣⲭⲱⲛ ⲉϥⲟⲩⲉϩⲥⲁϩⲛⲉ ⲛⲛϩⲉⲑⲛⲟⲥ</ab>
5 ⲛϩⲉⲑⲛⲟⲥ ⲉⲧⲉⲛⲥⲉⲥⲟⲟⲩⲛ ⲙⲙⲟⲕ ⲁⲛ ⲛⲁⲉⲡⲓⲕⲁⲗⲉⲓ ⲙⲙⲟⲕ ⲛⲗⲁⲟⲥ ⲉⲧⲉⲛⲥⲉⲥⲟⲟⲩⲛ ⲙⲙⲟⲕ ⲁⲛ ⲛⲁⲡⲱⲧ ⲉⲣⲁⲧⲕ ⲉⲧⲃⲉ ⲡⲉⲕⲛⲟⲩⲧⲉ ⲡⲉⲧⲟⲩⲁⲁⲃ ⲙⲡⲓⲥⲣⲁⲏⲗ ϫⲉ ⲁϥϯⲉⲟⲟⲩ ⲛⲁⲕ ϣⲓⲛⲉ ⲛⲥⲁ ⲡⲛⲟⲩⲧⲉ</ab>
6 ⲁⲩⲱ ⲉⲧⲉⲧⲛϣⲁⲛϩⲉ ⲉⲣⲟϥ ⲉⲡⲓⲕⲁⲗⲉⲓ ⲙⲙⲟϥ ⲛⲧⲉⲩⲛⲟⲩ ⲉⲧϥⲛⲁϩⲱⲛ ⲉⲣⲱⲧⲛ</ab>
7 ⲙⲁⲣⲉⲡⲁⲥⲉⲃⲏⲥ ⲕⲱ ⲛⲥⲱϥ ⲛⲛⲉϥϩⲓⲟⲟⲩⲉ ⲁⲩⲱ ⲡⲣⲱⲙⲉ ⲛⲁⲛⲟⲙⲟⲥ ⲛⲛⲉϥϣⲟϫⲛⲉ ⲁⲩⲱ ⲙⲁⲣⲉϥⲕⲟⲧϥ ⲉⲡϫⲟⲉⲓⲥ ⲁⲩⲱ ϥⲛⲁⲛⲁ ⲛⲁϥ ϫⲉ ϥⲛⲁⲕⲱ ⲉⲃⲟⲗ ⲉⲙⲁⲧⲉ ⲛⲛⲉⲧⲛⲛⲟⲃⲉ</ab>
8 ⲛⲉⲣⲉⲛⲁϣⲟϫⲛⲉ ⲅⲁⲣ ⲟ ⲛⲑⲉ ⲁⲛ ⲛⲛⲉⲧⲛϣⲟϫⲛⲉ ⲁⲩⲱ ⲛⲉⲣⲉⲛⲁϩⲓⲟⲟⲩⲉ ⲟ ⲁⲛ ⲛⲑⲉ ⲛⲛⲉⲧⲛϩⲓⲟⲟⲩⲉ</ab>
9 ⲁⲗⲗⲁ ⲛⲑⲉ ⲉⲧⲉⲣⲉⲧⲡⲉ ⲟⲩⲏⲩ ⲉⲃⲟⲗ ⲙⲡⲕⲁϩ ⲧⲁⲓ ⲧⲉ ⲑⲉ ⲉⲧⲉⲣⲉⲧⲁϩⲓⲏ ⲟⲩⲏⲩ ⲉⲃⲟⲗ ⲛⲧⲉⲧⲛϩⲓⲏ ⲁⲩⲱ ⲛⲉⲧⲛⲙⲉⲉⲩⲉ ⲙⲡⲁⲙⲉⲉⲩⲉ</ab>
10 ⲛⲑⲉ ⲅⲁⲣ ⲉⲧⲉⲣⲉⲟⲩⲭⲓⲱⲛ ⲏ ⲟⲩϩⲱⲟⲩ ⲛⲏⲩ ⲉⲡⲉⲥⲏⲧ ⲉⲃⲟⲗ ϩⲛ ⲧⲡⲉ ⲁⲩⲱ ⲛⲛⲉϥⲕⲟⲧϥ ⲉⲡⲁϩⲟⲩ ϣⲁⲛⲧⲉϥⲧⲥⲓⲉⲡⲕⲁϩ ⲁⲩⲱ ⲛϥϫⲡⲟ ⲛϥϯⲟⲩⲱ ⲛϥϯ ⲛⲟⲩϭⲣⲟϭ ⲙⲡⲉⲧϫⲟ ⲁⲩⲱ ⲟⲩⲟⲉⲓⲕ ⲉⲟⲩⲟⲙϥ</ab>
11 ⲧⲁⲓ ⲧⲉ ⲑⲉ ⲙⲡⲁϣⲁϫⲉ ⲉⲧⲛⲏⲩ ⲉⲃⲟⲗ ϩⲛ ⲣⲱⲓ ⲛⲛⲉϥⲕⲟⲧϥ ⲉⲡⲁϩⲟⲩ ϣⲁⲛⲧⲉϣⲁϫⲉ ⲛⲓⲙ ⲉⲛⲧⲁⲓϫⲟⲟⲩ ϫⲱⲕ ⲉⲃⲟⲗ ⲁⲩⲱ ϯⲛⲁⲥⲟⲟⲩⲧⲛ ⲛⲛⲁϩⲓⲟⲟⲩⲉ ⲙⲛ ⲛⲁⲟⲩⲉϩⲥⲁϩⲛⲉ</ab>
12 ⲧⲉⲧⲛⲛⲏⲩ ⲅⲁⲣ ⲉⲃⲟⲗ ϩⲛ ⲟⲩⲟⲩⲛⲟϥ ⲁⲩⲱ ⲥⲉⲛⲁⲛⲧⲏⲩⲧⲛ ϩⲛ ⲟⲩⲣⲁϣⲉ ⲛⲧⲟⲟⲩ ⲅⲁⲣ ⲙⲛ ⲛⲥⲓⲃⲧ ⲛⲁϫⲓϥⲟϭⲥ ⲉⲩϭⲱϣⲧ ⲉⲃⲟⲗ ϩⲏⲧⲧⲏⲩⲧⲛ ϩⲛ ⲟⲩⲣⲁϣⲉ ⲁⲩⲱ ⲛϣⲏⲛ ⲧⲏⲣⲟⲩ ⲛⲧⲥⲱϣⲉ ⲛⲁⲥⲧⲁⲁⲧⲉ ⲛⲛⲉⲩⲕⲗⲁⲇⲟⲥ</ab>
13 ⲁⲩⲱ ⲉⲡⲙⲁ ⲛⲧⲉⲥⲧⲟⲓⲃⲏ ⲟⲩⲛⲟⲩⲕⲩⲡⲁⲣⲓⲥⲥⲟⲥ ⲛⲁⲣⲱⲧ ⲁⲩⲱ ⲟⲩⲙⲩⲣⲥⲓⲛⲏ ⲉⲡⲙⲁ ⲛⲟⲩⲉⲛⲟⲩⲛⲅ ⲁⲩⲱ ⲡϫⲟⲉⲓⲥ ⲛⲁϣⲱⲡⲉ ⲉⲩⲣⲁⲛ ⲁⲩⲱ ⲉⲩⲙⲁⲉⲓⲛ ⲛϣⲁ ⲉⲛⲉϩ ⲁⲩⲱ ⲛϥⲛⲁⲱⲥⲕ ⲁⲛ</ab>