1 ⲧⲱⲟⲩⲛⲉ ⲧⲱⲟⲩⲛⲉ ⲥⲓⲱⲛ ⲛϯ ϩⲓⲱⲱⲧⲉ ⲛⲧⲟⲩϭⲟⲙ ⲁⲩⲱ ⲛⲧⲟ ϩⲱⲱⲧⲉ ⲛⲧⲉϯ ⲙⲡⲟⲩⲉⲟⲟⲩ ϩⲓⲱⲱⲧⲉ ⲑⲓⲉⲣⲟⲩⲥⲁⲗⲏⲙ ⲧⲡⲟⲗⲓⲥ ⲉⲧⲟⲩⲁⲁⲃ ⲛⲛⲉϥⲟⲩⲱϩ ⲉⲧⲟⲟⲧϥ ⲉⲉⲓ ⲉⲃⲟⲗ ϩⲓⲧⲟⲟⲧⲉ ⲛϭⲓ ⲁⲧⲥⲃⲃⲉ ϩⲓ ⲁⲕⲁⲑⲁⲣⲧⲟⲥ</ab>
2 ⲛⲟⲩϩⲉ ⲉⲃⲟⲗ ⲙⲡϣⲟⲉⲓϣ ⲛⲧⲉⲧⲱⲟⲩⲛ ⲛⲧⲉϩⲙⲟⲟⲥ ⲑⲓⲉⲣⲟⲩⲥⲁⲗⲏⲙ ⲃⲱⲗ ⲉⲃⲟⲗ ⲛⲧⲙⲣⲣⲉ ⲙⲡⲟⲩⲙⲟⲕϩ ⲧⲁⲓⲭⲙⲁⲗⲱⲧⲟⲥ ⲧϣⲉⲉⲣⲉ ⲛⲥⲓⲱⲛ</ab>
3 ϫⲉ ⲧⲁⲓ ⲧⲉ ⲑⲉ ⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲥ ϫⲉ ⲛⲧⲁⲩϯⲧⲏⲩⲧⲛ ⲉⲃⲟⲗ ⲛϫⲓⲛϫⲏ ⲁⲩⲱ ⲛⲛⲉⲩⲛⲁⲥⲉⲧⲧⲏⲩⲧⲛ ⲁⲛ ϩⲛ ⲟⲩϩⲁⲧ</ab>
4 ⲧⲁⲓ ⲧⲉ ⲑⲉ ⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲥ ϫⲉ ⲁⲡⲁⲗⲁⲟⲥ ⲃⲱⲕ ⲉⲡⲉⲥⲏⲧ ⲉⲕⲏⲙⲉ ⲛϣⲟⲣⲡ ⲉⲟⲩⲱϩ ⲙⲙⲁⲩ ⲁⲩⲱ ⲁϥϥⲓⲧⲟⲩ ⲛϭⲟⲛⲥ ⲉⲛⲁⲥⲥⲩⲣⲓⲟⲥ</ab>
5 ⲧⲉⲛⲟⲩ ϭⲉ ⲉⲧⲉⲧⲛⲣ ⲟⲩ ⲙⲡⲉⲓⲙⲁ ⲛⲁⲓ ⲛⲉ ⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉ ⲁⲩϫⲓ ⲙⲡⲁⲗⲁⲟⲥ ⲛϫⲓⲛϫⲏ ⲁⲣⲓϣⲡⲏⲣⲉ ⲛⲧⲉⲧⲛⲱϣ ⲉⲃⲟⲗ ⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉ ⲉⲧⲃⲉ ⲧⲏⲩⲧⲛ ⲥⲉϫⲓⲟⲩⲁ ⲉⲡⲁⲣⲁⲛ ϩⲛ ⲛϩⲉⲑⲛⲟⲥ ⲛⲟⲩⲟⲉⲓϣ ⲛⲓⲙ</ab>
6 ⲉⲧⲃⲉ ⲡⲁⲓ ⲡⲁⲗⲁⲟⲥ ⲛⲁⲥⲟⲩⲛⲡⲁⲣⲁⲛ ϩⲙ ⲡⲉϩⲟⲟⲩ ⲉⲧⲙⲙⲁⲩ ϫⲉ ⲁⲛⲟⲕ ⲡⲉ ⲡⲉⲧϣⲁϫⲉ ϯⲙⲡⲉⲓⲙⲁ</ab>
7 ⲛⲑⲉ ⲛⲟⲩⲟⲩⲛⲟⲩ ϩⲓ ⲛⲧⲟⲟⲩ ⲛⲑⲉ ⲛⲛⲟⲩⲉⲣⲏⲧⲉ ⲙⲡⲉⲧⲧⲁϣⲉⲟⲉⲓϣ ⲛⲟⲩⲥⲙⲏ ⲛⲉⲓⲣⲏⲛⲏ ⲛⲑⲉ ⲙⲡⲉⲧⲉⲩⲁⲅⲅⲉⲗⲓⲍⲉ ⲛϩⲉⲛⲁⲅⲁⲑⲟⲛ ϫⲉ ϯⲛⲁⲧⲣⲉⲩⲥⲱⲧⲙ ⲉⲡⲟⲩϫⲁⲓ ⲉⲓϫⲱ ⲙⲙⲟⲥ ϫⲉ ⲥⲓⲱⲛ ⲡⲟⲩⲛⲟⲩⲧⲉ ⲛⲁⲣⲣⲣⲟ ⲉϩⲣⲁⲓ ⲉϫⲱ</ab>
8 ϫⲉ ⲁⲡⲉϩⲣⲟⲟⲩ ⲛⲛⲉⲧⲁⲣⲉϩ ⲉⲣⲟ ϫⲓⲥⲉ ⲁⲩⲱ ⲥⲉⲛⲁⲉⲩⲫⲣⲁⲛⲉ ϩⲛ ⲧⲉⲥⲙⲏⲧⲉ ϩⲓ ⲟⲩⲥⲟⲡ ϫⲉ ⲥⲉⲛⲁⲛⲁⲩ ⲛϩⲟ ⲙⲛ ϩⲟ ⲉⲣϣⲁⲛⲡϫⲟⲉⲓⲥ ⲛⲁ ⲛⲥⲓⲱⲛ</ab>
9 ⲙⲁⲣⲉⲛϫⲁⲓⲉ ⲛⲑⲓⲉⲣⲟⲩⲥⲁⲗⲏⲙ ⲱϣ ⲉⲃⲟⲗ ϩⲛ ⲟⲩⲟⲩⲛⲟϥ ϩⲓ ⲟⲩⲥⲟⲡ ϫⲉ ⲁϥⲛⲁ ⲛⲁⲥ ⲁⲩⲱ ⲁϥⲛⲟⲩϩⲙ ⲙⲙⲟⲥ</ab>
10 ⲁⲩⲱ ⲡϫⲟⲉⲓⲥ ⲛⲁϭⲱⲗⲡ ⲉⲃⲟⲗ ⲙⲡⲉϥϭⲃⲟⲓ ⲉⲧⲟⲩⲁⲁⲃ ⲙⲡⲉⲙⲧⲟ ⲉⲃⲟⲗ ⲛⲛϩⲉⲑⲛⲟⲥ ⲧⲏⲣⲟⲩ ⲁⲩⲱ ⲛϩⲉⲑⲛⲟⲥ ⲧⲏⲣⲟⲩ ⲛⲁⲛⲁⲩ ϫⲓⲛ ⲁⲣⲏϫϥ ⲙⲡⲕⲁϩ ⲉⲡⲟⲩϫⲁⲓ ⲡⲉ ⲉⲃⲟⲗ ϩⲓⲧⲟⲟⲧϥ ⲙⲡⲛⲟⲩⲧⲉ</ab>
11 ⲥⲁϩⲱⲧⲏⲩⲧⲛ ⲉⲃⲟⲗ ⲥⲁϩⲱⲧⲛ ⲉⲃⲟⲗ ⲁⲙⲏⲓⲧⲛ ⲉⲃⲟⲗ ⲙⲙⲁⲩ ⲁⲩⲱ ⲙⲡⲣϫⲱϩ ⲉⲁⲕⲁⲑⲁⲣⲧⲟⲥ ⲁⲙⲏⲓⲧⲛ ⲉⲃⲟⲗ ϩⲛ ⲧⲉⲥⲙⲏⲧⲉ ⲁⲩⲱ ⲛⲧⲉⲧⲛⲡⲣϫⲧⲏⲩⲧⲛ ⲉⲃⲟⲗ ⲛⲉⲧⲉⲓⲛⲉ ⲛⲛⲉϩⲛⲁⲁⲩ ⲙⲡϫⲟⲉⲓⲥ</ab>
12 ϫⲉ ⲉⲧⲉⲧⲛⲛⲏⲩ ⲁⲛ ⲉⲃⲟⲗ ϩⲛ ⲟⲩϣⲧⲟⲣⲧⲣ ⲟⲩⲇⲉ ⲉⲧⲉⲧⲛⲁⲙⲟⲟϣⲉ ⲁⲛ ϩⲛ ⲟⲩⲡⲱⲧ ⲡϫⲟⲉⲓⲥ ⲅⲁⲣ ⲡⲉⲧⲛⲁⲙⲟⲟϣⲉ ϩⲁ ⲧⲉⲧⲛϩⲏ ⲁⲩⲱ ⲡⲉⲧⲥⲱⲟⲩϩ ⲙⲙⲱⲧⲛ ⲉϩⲟⲩⲛ ⲡⲉ ⲡϫⲟⲉⲓⲥ ⲡⲛⲟⲩⲧⲉ ⲙⲡⲓⲥⲣⲁⲏⲗ</ab>
13 ⲉⲓⲥ ϩⲏⲏⲧⲉ ⲡⲁϣⲏⲣⲉ ⲛⲁⲉⲓⲙⲉ ⲁⲩⲱ ⲛϥϫⲓⲥⲉ ⲛϥϫⲓⲉⲟⲟⲩ ⲉⲙⲁⲧⲉ</ab>
14 ⲛⲑⲉ ⲉⲧⲉⲣⲉϩⲁϩ ⲛⲁⲣϣⲡⲏⲣⲉ ⲉϩⲣⲁⲓ ⲉϫⲱⲕ ⲧⲁⲓ ⲧⲉ ⲑⲉ ⲉⲧⲉⲣⲉⲡⲉⲕⲉⲓⲛⲉ ⲛⲁⲥⲱϣϥ ⲛⲧⲛⲛⲣⲱⲙⲉ ⲁⲩⲱ ⲡⲉⲕⲉⲟⲟⲩ ⲉⲃⲟⲗ ϩⲛ ⲛⲣⲱⲙⲉ</ab>
15 ⲛϩⲉⲑⲛⲟⲥ ⲉⲧⲟϣ ⲛⲁⲣϣⲡⲏⲣⲉ ⲛⲧⲉⲓϩⲉ ⲉϩⲣⲁⲓ ⲉϫⲱϥ ⲁⲩⲱ ⲛⲣⲣⲱⲟⲩ ⲛⲁϣⲧⲁⲙ ⲛⲧⲉⲩⲧⲁⲡⲣⲟ ϫⲉ ⲛⲉⲧⲙⲡⲟⲩϫⲱ ⲛⲁⲩ ⲉⲧⲃⲏⲏⲧϥ ⲛⲁⲛⲁⲩ ⲉⲣⲟϥ ⲁⲩⲱ ⲛⲉⲧⲙⲡⲟⲩⲥⲱⲧⲙ ⲛⲁⲉⲓⲙⲉ</ab>