1 ⲡϣⲁϫⲉ ⲛⲧⲉ ⲡϫⲁⲓⲉ ⲛⲑⲉ ⲛⲟⲩϩⲁⲧⲏⲩ ϩⲓⲧⲛ ⲟⲩϫⲁⲓⲉ ⲛⲥⲉⲓ ⲉⲃⲟⲗ ϩⲙ ⲡϫⲁⲓⲉ ⲉⲥⲛⲏⲩ ⲉⲃⲟⲗ ϩⲙ ⲡⲕⲁϩ</ab>
2 ⲡϩⲟⲣⲟⲙⲁ ⲟ ⲛϩⲟⲧⲉ ⲁⲩⲱ ⲁⲩϫⲱ ⲛⲁⲓ ⲛⲟⲩϩⲱⲃ ⲉϥⲛⲁϣⲧ ⲡⲉⲧⲁⲑⲉⲧⲉⲓ ϥⲛⲁⲁⲑⲁⲓⲧⲉⲓ ⲁⲩⲱ ⲡⲉⲧⲁⲛⲟⲙⲉⲓ ϥⲛⲁⲁⲛⲟⲙⲓ ⲛϩⲏⲧ ⲛⲉⲗⲁⲙⲓⲧⲏⲥ ⲙⲛ ⲛⲃⲁⲓϣⲓⲛⲉ ⲙⲡⲣⲣⲟ ⲛⲙⲡⲉⲣⲥⲏⲥ ⲛⲏⲩ ⲉϩⲣⲁⲓ ⲉϫⲱⲓ ⲧⲉⲛⲟⲩ ϯⲛⲁⲁϣ ⲁϩⲟⲙ ⲧⲁⲡⲁⲣⲁⲕⲁⲗⲉⲓ ⲙⲙⲟⲓ</ab>
3 ϫⲉ ⲁⲧⲁϯⲡⲉ ⲙⲟⲩϩ ⲛⲥⲱϣⲙ ⲁⲩⲱ ⲁⲛⲛⲁⲁⲕⲉ ⲧⲁϩⲟⲓ ⲛⲑⲉ ⲛⲧⲉⲧⲛⲁⲙⲓⲥⲉ ⲁⲓϫⲓ ⲛϭⲟⲛⲥ ⲙⲡⲉⲓⲥⲱⲧⲙ ⲁⲓϭⲉⲡⲏ ⲉⲧⲙⲛⲁⲩ ⲉⲃⲟⲗ</ab>
4 ⲁⲡⲁϩⲏⲧ ⲡⲗⲁⲛⲁ ⲁⲩⲱ ⲧⲁⲁⲛⲟⲙⲓⲁ ⲱⲙⲥ ⲙⲙⲟⲓ ⲁⲧⲁⲯⲩⲭⲏ ϩⲉ ⲉⲩϩⲟⲧⲉ</ab>
5 ⲥⲟⲃⲧⲉ ⲛⲟⲩⲧⲣⲁⲡⲉⲍⲁ ⲥⲱ ⲟⲩⲱⲙ ⲧⲱⲟⲩⲛ ⲛⲁⲣⲭⲱⲛ ⲥⲟⲃⲧⲉ ⲛϩⲉⲛⲑⲏⲣⲟⲛ</ab>
6 ϫⲉ ⲧⲁⲓ ⲧⲉ ⲑⲉ ⲛⲧⲁⲡϫⲟⲉⲓⲥ ϫⲟⲟⲥ ⲛⲁⲓ ϫⲉ ⲃⲱⲕ ⲛⲅⲧⲁϩⲟ ⲛⲁⲕ ⲉⲣⲁⲧϥ ⲛⲟⲩⲥⲕⲟⲡⲟⲥ ⲁⲩⲱ ⲡⲉⲧⲕⲛⲁⲛⲁⲩ ⲉⲣⲟϥ ⲁϫⲓϥ</ab>
7 ⲁⲩⲱ ⲁⲓⲛⲁⲩ ⲉⲁⲛⲁⲃⲁⲧⲏⲥ ⲥⲛⲁⲩ ⲛϩⲧⲟ ⲁⲩⲱ ⲟⲩⲁⲛⲁⲃⲁⲧⲏⲥ ⲛⲓⲱ ⲙⲛ ⲟⲩⲁⲛⲁⲃⲁⲧⲏⲥ ⲛϭⲁⲙⲟⲩⲗ ⲥⲱⲧⲙ ⲉⲩⲛⲟϭ ⲛϣⲁϫⲉ</ab>
8 ⲁⲩⲱ ⲙⲟⲩⲧⲉ ⲉⲟⲩⲣⲓⲁⲥ ⲉⲡⲛⲁⲩ ⲙⲡϫⲟⲉⲓⲥ ⲁⲩⲱ ⲡⲉϫⲁϥ ϫⲉ ⲁⲓⲁϩⲉⲣⲁⲧ ⲙⲡⲉϩⲟⲟⲩ ⲧⲏⲣϥ ⲉϫⲛ ⲧⲡⲁⲣⲙⲃⲟⲗⲏ ⲁⲛⲟⲕ ⲁⲓⲁϩⲉⲣⲁⲧ ⲛⲧⲉⲩϣⲏ ⲧⲏⲣⲥ</ab>
9 ⲁⲩⲱ ⲉⲓⲥ ϩⲏⲏⲧⲉ ⲛⲧⲟϥ ϥⲛⲏⲩ ⲉϥⲁⲗⲉ ⲉϩⲣⲁⲓ ⲉϫⲛ ⲟⲩⲕⲁⲣⲟⲩⲭⲓⲟⲛ ⲁⲩⲱ ⲁϥⲟⲩⲱϣⲃ ⲡⲉϫⲁϥ ϫⲉ ⲁⲧⲃⲁⲃⲩⲗⲱⲛ ϩⲉ ⲁⲩⲱ ⲛⲉⲥⲧⲟⲩⲱⲧ ⲧⲏⲣⲟⲩ ⲙⲛ ⲛⲉⲥⲙⲟⲩⲛⲅ ⲛϭⲓϫ ⲧⲏⲣⲟⲩ ⲁⲩⲟⲩⲱϣϥ ⲉϩⲣⲁⲓ ⲉϫⲙ ⲡⲕⲁϩ</ab>
10 ⲥⲱⲧⲙ ⲛⲉⲧⲥⲉⲉⲡⲉ ϫⲓⲥⲙⲏ ⲛⲉⲧⲙⲟⲕϩ ⲛϩⲏⲧ ⲁⲓⲥⲱⲧⲙ ⲉⲩⲥⲙⲏ ⲉⲃⲟⲗ ϩⲓⲧⲙ ⲡϫⲟⲉⲓⲥ ⲥⲁⲃⲁⲱⲑ ⲡⲛⲟⲩⲧⲉ ⲙⲡⲓⲥⲣⲁⲏⲗ ⲁϥⲧⲁⲙⲱⲧⲛ</ab>
11 ⲡϩⲟⲣⲟⲙⲁ ⲛϯⲇⲟⲩⲙⲁⲓⲁ ⲙⲟⲩⲧⲉ ⲛⲁⲓ ⲉⲃⲟⲗ ϩⲓⲧⲛ ⲥⲏⲉⲓⲣ ⲁϫⲓⲥ ϫⲉ ⲁϩⲣⲟⲕ ⲕⲱϣ ⲉⲃⲟⲗ ϩⲁⲣⲉϩ ⲉⲙⲙⲁ ⲛⲣⲟⲉⲓⲥ</ab>
12 ϩⲁⲣⲉϩ ⲉϩⲧⲟⲟⲩⲉ ⲙⲛ ⲧⲉⲩϣⲏ ⲉⲕϣⲁⲛϣⲓⲛⲉ ϣⲓⲛⲉ ⲛⲅⲟⲩⲱϩ ϩⲁϩⲧⲏⲓ</ab>
13 ϩⲙ ⲡⲉⲇⲣⲩⲙⲟⲥ ϥⲛⲁⲛⲕⲟⲧⲕ ⲉⲣⲟⲩϩⲉ ϩⲛ ⲇⲁⲓⲇⲁⲛ</ab>
14 ⲁⲛⲓⲛⲉ ⲛⲟⲩⲙⲟⲟⲩ ⲉⲧⲱⲙⲛⲧ ⲉⲡⲉⲧⲟⲃⲉ ⲧⲱⲙⲛⲧ ⲉⲡⲉⲧⲡⲏⲧ ⲙⲛ ϩⲉⲛⲟⲉⲓⲕ ⲛⲉⲧⲟⲩⲏϩ ϩⲛ ⲧⲉⲭⲱⲣⲁ ⲛⲑⲁⲓⲙⲁⲛ</ab>
15 ⲉⲧⲃⲉ ⲡⲁϣⲁⲓ ⲛⲛⲉⲧⲡⲏⲧ ⲙⲛ ⲡⲁϣⲁⲓ ⲛⲛⲉⲧⲥⲟⲣⲙ ⲁⲩⲱ ⲉⲧⲃⲉ ⲡⲁϣⲁⲓ ⲛⲧⲥⲏⲃⲉ ⲁⲩⲱ ⲉⲧⲃⲉ ⲡⲁϣⲁⲓ ⲛⲙⲡⲓⲧⲉ ⲉⲧϫⲟⲗⲕ ⲁⲩⲱ ⲉⲧⲃⲉ ⲡⲁϣⲁⲓ ⲛⲛⲉⲛⲧⲁⲩϩⲉ ϩⲙ ⲡⲡⲟⲗⲉⲙⲟⲥ</ab>
16 ϫⲉ ⲧⲁⲓ ⲧⲉ ⲑⲉ ⲛⲧⲁⲡϫⲟⲉⲓⲥ ϫⲟⲟⲥ ⲛⲁⲓ ϫⲉ ⲉⲧⲉⲓⲕⲉⲣⲟⲙⲡⲉ ⲛⲑⲉ ⲛⲟⲩⲣⲟⲙⲡⲉ ⲛϫⲁⲓⲃⲉⲕⲏ ⲛϥⲱϫⲛ ⲛϭⲓ ⲡⲉⲟⲟⲩ ⲛⲛϣⲏⲣⲉ ⲛⲕⲏⲇⲁⲣ</ab>
17 ⲁⲩⲱ ⲡⲥⲉⲉⲡⲉ ⲛⲙⲡⲓⲧⲉ ⲉⲧϫⲟⲟⲣ ⲛⲛϣⲏⲣⲉ ⲛⲕⲏⲇⲁⲣ ⲥⲉⲛⲁⲥⲃⲟⲕ ϫⲉ ⲁⲡϫⲟⲉⲓⲥ ⲡⲛⲟⲩⲧⲉ ⲙⲡⲓⲥⲣⲁⲏⲗ ϣⲁϫⲉ</ab>