1 ⲑⲟⲣⲁⲥⲓⲥ ⲛⲕⲏⲙⲉ ⲉⲓⲥ ⲡϫⲟⲉⲓⲥ ϥϩⲙⲟⲟⲥ ϩⲓϫⲛ ⲟⲩⲕⲗⲟⲟⲗⲉ ⲉⲥⲁⲥⲱⲟⲩ ⲁⲩⲱ ϥⲛⲏⲩ ⲉϩⲣⲁⲓ ⲉⲕⲏⲙⲉ ⲙⲙⲟⲩⲛⲅ ⲛϭⲓϫ ⲧⲏⲣⲟⲩ ⲛⲕⲏⲙⲉ ⲛⲁⲕⲓⲙ ⲙⲡⲉϥⲙⲧⲟ ⲉⲃⲟⲗ ⲁⲩⲱ ⲡⲉⲩϩⲏⲧ ⲛⲁϭⲱⲧⲡ ϩⲣⲁⲓ ⲛϩⲏⲧⲟⲩ</ab>
2 ⲁⲩⲱ ⲛⲣⲙⲛⲕⲏⲙⲉ ⲛⲁⲧⲱⲟⲩⲛ ⲉϫⲛ ⲛⲣⲙⲛⲕⲏⲙⲉ ⲁⲩⲱ ⲡⲣⲱⲙⲉ ⲛⲁⲙⲓϣⲉ ⲙⲛ ⲡⲉϥⲥⲟⲛ ⲡⲣⲱⲙⲉ ⲙⲛ ⲡⲉⲧϩⲓⲧⲟⲩⲱϥ ⲟⲩⲛⲟⲩⲡⲟⲗⲓⲥ ⲛⲁⲧⲱⲟⲩⲛ ⲉϫⲛ ⲟⲩⲡⲟⲗⲓⲥ ⲁⲩⲱ ⲟⲩⲧⲟϣ ⲉϫⲛ ⲟⲩⲧⲟϣ</ab>
3 ⲛⲧⲉⲡⲉⲡⲛⲁ ⲛⲛⲣⲙⲛⲕⲏⲙⲉ ϣⲧⲟⲣⲧⲣ ϩⲣⲁⲓ ⲛϩⲏⲧⲟⲩ ⲁⲩⲱ ϯⲛⲁϫⲱⲱⲣⲉ ⲉⲃⲟⲗ ⲙⲡⲉⲩϣⲟϫⲛⲉ ⲁⲩⲱ ⲥⲉⲛⲁϣⲓⲛⲉ ⲛⲛⲉⲩⲛⲟⲩⲧⲉ ⲙⲛ ⲛⲉⲩⲧⲟⲩⲱⲧ ⲙⲛ ⲛⲉⲧⲙⲟⲩⲧⲉ ⲉⲃⲟⲗ ϩⲙ ⲡⲕⲁϩ ⲙⲛ ⲛⲉⲧϣⲁϫⲉ ⲉⲃⲟⲗ ⲛϩⲏⲧⲟⲩ</ab>
4 ⲁⲩⲱ ϯⲛⲁϯ ⲛⲕⲏⲙⲉ ⲉⲛϭⲓϫ ⲛϩⲉⲛⲣⲱⲙⲉ ⲛϫⲟⲉⲓⲥ ⲉⲩⲛⲁϣⲧ ⲁⲩⲱ ⲟⲩⲛϩⲉⲛⲉⲣⲱⲟⲩ ⲉⲩⲛⲁϣⲧ ⲛⲁⲣϫⲟⲉⲓⲥ ⲉⲣⲟⲟⲩ ⲛⲁⲓ ⲛⲉⲧⲉⲣⲉⲡϫⲟⲉⲓⲥ ⲡⲛⲟⲩⲧⲉ ⲥⲁⲃⲁⲱⲑ ϫⲱ ⲙⲙⲟⲟⲩ</ab>
5 ⲁⲩⲱ ⲛⲣⲙⲛⲕⲏⲙⲉ ⲛⲁⲥⲱ ⲙⲡⲙⲟⲟⲩ ⲉⲧϩⲁⲧⲛ ⲑⲁⲗⲁⲥⲥⲁ ⲡⲓⲉⲣⲟ ⲇⲉ ⲛⲁⲱϫⲛ ⲛϥϣⲟⲟⲩⲉ</ab>
6 ⲁⲩⲱ ⲛⲧⲉⲛⲓⲉⲣⲱⲟⲩ ⲱϫⲛ ⲙⲛ ⲛⲓⲟⲟⲣ ⲙⲡⲓⲉⲣⲟ ⲁⲩⲱ ⲥⲟⲟⲩϩⲥ ⲛⲓⲙ ⲙⲙⲟⲟⲩ ⲛⲁϣⲟⲟⲩⲉ ⲁⲩⲱ ϩⲩⲗⲟⲥ ⲛⲓⲙ ⲛⲕⲁϣ ϩⲓ ϫⲟⲟⲩϥ</ab>
7 ⲁⲩⲱ ⲡⲁϩⲣ ⲉⲧⲟⲩⲉⲧⲟⲩⲱⲧ ⲛⲁϣⲟⲟⲩⲉ ⲉⲡⲧⲏⲣϥ ⲉⲧⲙⲡⲕⲱⲧⲉ ⲙⲡⲓⲉⲣⲟ ⲁⲩⲱ ⲡⲉⲧⲟⲩϫⲟ ⲙⲙⲟϥ ⲧⲏⲣϥ ϩⲓϫⲙ ⲡⲙⲟⲟⲩ ⲛⲁϣⲟⲟⲩⲉ ϩⲛ ⲟⲩϫⲛⲧⲏⲩ</ab>
8 ⲛⲟⲩⲱϩⲉ ⲛⲁⲁϣ ⲁϩⲟⲙ ⲁⲩⲱ ⲥⲉⲛⲁⲁϣ ⲁϩⲟⲙ ⲧⲏⲣⲟⲩ ⲛϭⲓ ⲛⲉⲧⲛⲉϫⲟⲓⲙⲉ ⲉⲡⲓⲉⲣⲟ ⲙⲛ ⲛⲉⲧⲛⲉϫⲁⲃⲱ ⲁⲩⲱ ⲛⲉⲧⲛⲉϫϣⲛⲏ ⲛϩⲓⲟⲩⲉ ⲛⲁⲣϩⲏⲃⲉ</ab>
9 ⲁⲩⲱ ⲡϣⲓⲡⲉ ⲛⲁϫⲓ ⲛⲛⲉⲧⲣϩⲱⲃ ⲉⲡⲙⲁϩⲉ ⲛⲕⲱⲕ ⲙⲛ ⲛⲉⲧⲣϩⲱⲃ ⲉⲡϣⲛⲥ</ab>
10 ⲁⲩⲱ ⲛⲉⲧⲟⲩⲱⲧϩ ⲙⲙⲟⲟⲩ ⲛⲁϣⲱⲡⲉ ϩⲛ ⲟⲩⲙⲕⲁϩ ⲛϩⲏⲧ ⲁⲩⲱ ⲛⲉⲧⲧⲁⲙⲓⲟ ⲙⲡϩⲛⲕⲉ ⲧⲏⲣⲟⲩ ⲛⲁⲗⲩⲡⲏ ⲁⲩⲱ ⲛⲥⲉⲙⲕⲁϩ ⲉⲡⲉⲩϩⲏⲧ</ab>
11 ⲁⲩⲱ ⲛⲁⲣⲭⲱⲛ ⲛϫⲁⲁⲛⲉ ⲛⲁⲣⲥⲟϭ ⲛⲥⲟⲫⲟⲥ ⲛⲣⲉϥϫⲓϣⲟϫⲛⲉ ⲙⲡⲣⲣⲟ ⲁⲩⲱ ⲡⲉⲩϣⲟϫⲛⲉ ⲛⲁⲣⲥⲟϭ ⲛⲁϣ ⲛϩⲉ ⲧⲉⲧⲛⲁϫⲟⲟⲥ ⲙⲡⲣⲣⲟ ϫⲉ ⲁⲛⲟⲛ ⲛϣⲏⲣⲉ ⲛⲛⲥⲁⲃⲉⲉⲩ ⲛϣⲏⲣⲉ ⲙⲡⲣⲣⲟ ϫⲓⲛ ⲛϣⲟⲣⲡ</ab>
12 ⲉⲩⲧⲱⲛ ⲛⲉⲕⲥⲟⲫⲟⲥ ⲧⲉⲛⲟⲩ ⲙⲁⲣⲟⲩⲧⲁⲙⲟⲕ ⲛⲥⲉϫⲟⲟⲥ ⲛⲁⲕ ⲙⲁⲣⲟⲩⲉⲓⲙⲉ ϫⲉ ⲛⲧⲁⲡϫⲟⲉⲓⲥ ⲥⲁⲃⲁⲱⲑ ⲙⲉⲉⲩⲉ ⲉⲟⲩ ⲉϫⲛ ⲕⲏⲙⲉ</ab>
13 ⲁⲛⲁⲣⲭⲱⲛ ⲛϫⲁⲁⲛⲉ ⲱϫⲛ ⲁⲩⲱ ⲁⲩϫⲓϣⲓⲡⲉ ⲁⲩⲱ ⲁⲩϫⲓⲥⲱϣ ⲛϭⲓ ⲛⲁⲣⲭⲱⲛ ⲙⲙⲏⲃⲉ ⲥⲉⲛⲁⲡⲗⲁⲛⲁ ⲛⲕⲏⲙⲉ ⲕⲁⲧⲁ ⲫⲩⲗⲏ</ab>
14 ⲁⲡϫⲟⲉⲓⲥ ⲅⲁⲣ ⲕⲩⲣⲁ ⲛⲁⲩ ⲛⲟⲩⲡⲛⲉⲩⲙⲁ ⲛⲥⲱⲣⲙ ⲁⲩⲱ ⲁⲩⲡⲗⲁⲛⲁ ⲛⲕⲏⲙⲉ ϩⲛ ⲛⲉⲩϩⲃⲏⲩⲉ ⲧⲏⲣⲟⲩ ⲛⲑⲉ ⲛϣⲁϥⲡⲗⲁⲛⲁ ⲛϭⲓ ⲡⲉⲧⲧⲁϩⲉ ⲁⲩⲱ ⲡⲉⲧⲕⲁⲃⲟⲗ ϩⲓ ⲟⲩⲥⲟⲡ</ab>
15 ⲁⲩⲱ ⲙⲛϩⲱⲃ ⲛⲁϣⲱⲡⲉ ⲛⲛⲣⲙⲕⲏⲙⲉ ⲉϥⲛⲁⲣϫⲱϫ ϩⲓ ⲥⲁⲧ ⲁⲣⲭⲏ ϩⲓ ϩⲁⲏ</ab>
16 ϩⲙ ⲡⲉϩⲟⲟⲩ ⲉⲧⲙⲙⲁⲩ ⲛⲣⲙⲛⲕⲏⲙⲉ ⲛⲁⲣⲑⲉ ⲛⲛⲓⲥϩⲓⲙⲉ ϩⲛ ⲟⲩϩⲟⲧⲉ ⲙⲛ ⲟⲩⲥⲧⲱⲧ ⲙⲡⲉⲙⲧⲟ ⲉⲃⲟⲗ ⲛⲧϭⲓϫ ⲙⲡϫⲟⲉⲓⲥ ⲥⲁⲃⲁⲱⲑ ⲉⲧϥⲛⲁⲛⲧⲥ ⲉϫⲱⲟⲩ</ab>
17 ⲁⲩⲱ ⲧⲉⲭⲱⲣⲁ ⲛⲛⲓⲟⲩⲇⲁⲓ ⲛⲁϣⲱⲡⲉ ⲛϩⲟⲧⲉ ⲛⲛⲣⲙⲕⲏⲙⲉ ⲟⲩⲟⲛ ⲛⲓⲙ ⲉⲧⲧⲁⲩⲉⲣⲓⲛⲥ ⲛⲁⲩ ⲥⲉⲛⲁⲣϩⲟⲧⲉ ⲉⲧⲃⲉ ⲡϣⲟϫⲛⲉ ⲛⲧⲁⲡϫⲟⲉⲥ ⲙⲉⲉⲩⲉ ⲉⲣⲟϥ ⲉϩⲣⲁⲓ ⲉϫⲱⲥ</ab>
18 ϩⲙ ⲡⲉϩⲟⲟⲩ ⲉⲧⲙⲙⲁⲩ ⲟⲩⲛϯ ⲙⲡⲟⲗⲓⲥ ⲛⲁϣⲱⲡⲉ ϩⲛ ⲕⲏⲙⲉ ⲉⲩϣⲁϫⲉ ϩⲛ ⲧⲁⲥⲡⲉ ⲛⲛⲉⲭⲁⲛⲁⲛⲁⲓⲟⲥ ⲁⲩⲱ ⲉⲩⲱⲣⲕ ⲙⲡⲣⲁⲛ ⲙⲡϫⲟⲉⲓⲥ ⲥⲉⲛⲁⲙⲟⲩⲧⲉ ⲉⲧⲟⲩⲉⲓ ⲙⲡⲟⲗⲓⲥ ϫⲉ ⲁⲥⲉⲇⲉⲕ</ab>
19 ϩⲙ ⲡⲉϩⲟⲟⲩ ⲉⲧⲙⲙⲁⲩ ⲟⲩⲛⲟⲩⲑⲩⲥⲓⲁⲥⲧⲏⲣⲓⲟⲛ ⲛⲁϣⲱⲡⲉ ⲙⲡϫⲟⲉⲓⲥ ϩⲛ ⲧⲉⲭⲱⲣⲁ ⲛⲛⲣⲙⲛⲕⲏⲙⲉ ⲁⲩⲱ ⲟⲩⲥⲧⲩⲗⲏ ϩⲁⲧⲙ ⲡⲉⲥⲧⲟϣ ⲙⲡϫⲟⲉⲓⲥ</ab>
20 ⲁⲩⲱ ϥⲛⲁϣⲱⲡⲉ ⲉⲩⲙⲁⲉⲓⲛ ϣⲁ ⲉⲛⲉϩ ⲙⲡϫⲟⲉⲓⲥ ϩⲛ ⲧⲉⲭⲱⲣⲁ ⲛⲛⲣⲙⲛⲕⲏⲙⲉ ϫⲉ ⲥⲉⲛⲁϫⲓϣⲕⲁⲕ ⲉϩⲣⲁⲓ ⲉⲡϫⲟⲉⲓⲥ ⲡⲛⲟⲩⲧⲉ ⲉⲧⲃⲉ ⲛⲉⲧⲑⲗⲓⲃⲉ ⲙⲙⲟⲟⲩ ⲁⲩⲱ ⲡϫⲟⲉⲓⲥ ⲛⲁϫⲟⲟⲩ ⲛⲁⲩ ⲛⲟⲩⲣⲱⲙⲉ ⲡⲁⲓ ⲉⲧⲛⲁⲛⲁϩⲙⲟⲩ ϥⲛⲁⲛⲁϩⲙⲟⲩ ⲉϥⲕⲣⲓⲛⲉ</ab>
21 ⲁⲩⲱ ⲡϫⲟⲉⲓⲥ ⲛⲁⲟⲩⲱⲛϩ ⲉⲛⲣⲙⲛⲕⲏⲙⲉ ⲁⲩⲱ ⲛⲣⲙⲛⲕⲏⲙⲉ ⲛⲁⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ϩⲙ ⲡⲉϩⲟⲟⲩ ⲉⲧⲙⲙⲁⲩ ⲛⲥⲉⲉⲓⲣⲉ ⲛϩⲉⲛⲑⲩⲥⲓⲁ ⲛⲥⲉⲉⲣⲏⲧ ⲛϩⲉⲛⲉⲣⲏⲧ ⲙⲡϫⲟⲉⲓⲥ ⲛⲥⲉⲧⲁⲁⲩ</ab>
22 ⲁⲩⲱ ⲡϫⲟⲉⲓⲥ ⲛⲁⲡⲁⲧⲁⲥⲥⲉ ⲛⲛⲣⲙⲛⲕⲏⲙⲉ ϩⲛ ⲟⲩⲥⲁϣ ⲁⲩⲱ ⲛϥⲧⲁⲗϭⲟⲟⲩ ϩⲛ ⲟⲩⲧⲁⲗϭⲟ ⲁⲩⲱ ⲥⲉⲛⲁⲕⲟⲧⲟⲩ ⲉⲡϫⲟⲉⲓⲥ ⲛϥⲥⲱⲧⲙ ⲉⲣⲟⲟⲩ ⲛϥⲧⲁⲗϭⲟⲟⲩ</ab>
23 ⲟⲩⲛⲟⲩϩⲓⲏ ⲛⲁϣⲱⲡⲉ ϩⲙ ⲡⲉϩⲟⲟⲩ ⲉⲧⲙⲙⲁⲩ ⲛⲕⲏⲙⲉ ⲉⲛⲁⲥⲥⲩⲣⲓⲟⲥ ⲁⲩⲱ ⲛⲁⲥⲥⲩⲣⲓⲟⲥ ⲛⲁⲃⲱⲕ ⲉⲕⲏⲙⲉ ⲁⲩⲱ ⲛⲣⲙⲛⲕⲏⲙⲉ ⲛⲁⲃⲱⲕ ϣⲁ ⲛⲁⲥⲥⲩⲣⲓⲟⲥ ⲛⲧⲉⲛⲣⲙⲛⲕⲏⲙⲉ ⲣϩⲙϩⲁⲗ ⲛⲛⲁⲥⲥⲩⲣⲓⲟⲥ</ab>
24 ϩⲙ ⲡⲉϩⲟⲟⲩ ⲉⲧⲙⲙⲙⲁⲩ ⲡⲓⲥⲣⲁⲏⲗ ⲛⲁⲣⲙⲉϩϣⲟⲙⲛⲧ ϩⲛ ⲛⲁⲥⲥⲩⲣⲓⲟⲥ ⲁⲩⲱ ϩⲛ ⲛⲣⲙⲛⲕⲏⲙⲉ ⲉϥⲥⲙⲁⲙⲁⲁⲧ ϩⲙ ⲡⲕⲁϩ</ab>
25 ⲛⲧⲁⲡϫⲟⲉⲓⲥ ⲥⲁⲃⲁⲱⲑ ⲥⲙⲟⲩ ⲉⲣⲟϥ ⲉϥϫⲱ ⲙⲙⲟⲥ ϫⲉ ⲡⲁⲗⲁⲟⲥ ⲛⲁϣⲱⲡⲉ ⲉϥⲥⲙⲁⲙⲁⲁⲧ ⲉⲧϩⲛ ⲕⲏⲙⲉ ⲁⲩⲱ ⲉⲧϩⲛ ⲛⲁⲥⲥⲩⲣⲓⲟⲥ ⲙⲛ ⲡⲓⲥⲣⲁⲏⲗ ⲧⲁⲕⲗⲏⲣⲟⲛⲟⲙⲓⲁ</ab>