1 يَارْنِي إِلِيهُو ذڭْ وَاوَاڒْ، إِنَّا:
2 صْبَارْ شْوَايْثْ أَكِيذِي،
3 نشّْ أَذْ د-أَوْيغْ ثُوسّْنَا إِنُو
4 مَاغَارْ س ثِيذتّْ،
5 خْزَارْ، أَربِّي إِمْغَارْ أَطَّاسْ،
6 أَعفَّانْ وَارْ ث إِتّجِّي أَذْ إِدَّارْ،
7 نتَّا وَارْ إِسّْحيِّيذْ ثِيطَّاوِينْ نّسْ
8 مَاڒَا تّْوَاوْثنْ نِيثْنِي ذِي ڒڭْيُوضْ،
9 خنِّي إِسّْشنْ أَسنْ ثِيمڭَّا نْسنْ
10 يَارزّمْ أَمزُّوغْ نْسنْ إِ ؤُوبّخْ،
11 مَاڒَا سْڒِينْ ؤُ سخَّارنْ أَسْ،
12 مَاشَا مَاڒَا وَارْ سْڒِينْ،
13 نِيثْنِي إِنِّي إِسّْنِيعْمِيڒنْ ذڭْ وُوڒْ نْسنْ،
14 ڒعْمَارْ نْسنْ أَذْ إِمّثْ
15 أَذْ إِفكّْ أَمزْڒُوضْ ذِي ڒغْبنْ نّسْ،
16 أَمُّو إِ غَا إِعَارّنْ ؤُڒَا ذ شكْ
17 مَاشَا شكْ ثنُّوغذْ
18 حْضَا أَقَا أَسْعَارْ
19 مَا إِغُويَّانْ نّشْ
20 وَارْ تّْمژْرِي ذِي دْجِيڒثْ،
21 حْضَا إِخفْ نّشْ، وَارْ ڭُّورْ
22 خْزَارْ، أَربِّي إِسّْعُودْجْ س جّهْذْ نّسْ،
23 مَانْ ونْ إِ ذ أَسْ إِسّْشَاننْ أَبْرِيذْ؟
24 عْقڒْ أَذْ ثسّْعُودْجِيذْ
25 كُوڒْ بْنَاذمْ إِتّْوَاڒَا ت،
26 خْزَارْ، أَربِّي ذ أَمقّْرَانْ،
27 مَاغَارْ نتَّا إِجبّذْ
28 أَنْژَارْ نِّي زِي تّْنسْنِيسِينْ إِسيْنُوثنْ،
29 مَانْ ونْ إِتّْحَاكَانْ عمَّارْصْ
30 خْزَارْ، إِتّْبزّعْ ثَافَاوْثْ نّسْ
31 مَاغَارْ س ؤُيَا إِتّْشَارّعْ ڒڭْنُوسْ.
32 إِتّْشُورَّا إِفَاسّنْ نّسْ س ثْفَاوْثْ،
33 أَضَارْضحْ ن وَاسَّامنْ إِتّْبَارّحْ زَّايسْ،