1 जबा यीसु यो सबच गोस्टी को सिक्सा देवनो पुरो भयो, तबा आपरो चेला गीन, ला कव्हन लगियो।
2 “तुमी लोकहुन जानसो, का दुई दिवस को मंघा फसह को तिहार से। अना मानूस को टूरा बैरीहुन को हात मा कूरूस मा चघावन लाय धरायो जावन वारो से।”
3 तबा मुखिया याजक अना सयानो लोकगीन काइफा नाव को मोठो मुखिया याजक, को आँगन मा जमा भईन।
4 अना ओन्हीसीन कोनो तरकीब लक यीसु ला धरन अना मार डाकन को मन बनाईन।
5 मंग वय कव्हत होतीन, “आमला यो तिहार को दिवस नही करनो पाहिजे नही ता लोकहुन मा दंगा फसाद भयी सकासे।”
6 यीसु बैतनियाह गांव मा सिमोन को घर मा जोन कोढ को, बीमारी लक होतो वोको घर रुकयो।
7 तबा एक बायको यीसु को जवर आयी जबा यीसु जेवन लाई बसयो होतो, ओना एक कीमती इतर संगसंगमरमर को बरतन मा भरके आनिस अना ओना यीसु को डोस्की पर उबड़ाय देइस।
8 चेलाहुन ना असो चोयके गुस्सा होय गयीन, अना पुसन लगीन, एतरो कीमती इतर नास कायलाई करीसेव?
9 यो इतर ला आमी बिकता ता एक मोठो दाम मिलतो अना ओनो धन लक आमी गरीबहुन ला दे देता।
10 यीसु जान गयो का वय काजक कव्ह रही सेत। एकोलाई उनलक कव्हयो, “तुमी ऐना बायका ला काहे तंगा रही सेव? ओना ता मोरो लाई भलाई करीसेस।”
11 काहेका गरीब-गोर गीन, हमेसा तुमरो सँग रहेत, पर मि तुमरो सँग हमेसा नही रव्हन वालो सेऊ।
12 मोरो गाड़ो जावनो को तैय्यारी को लाय ओना मोरो तन मा, यो सुगंध वारो इतर उडेलीसेस।
13 मी खरो साँगसू का जबच कभी सारो जग मा जबा परमेस्वर को साजरो बारता मुनादी कियो जाहेत, तबा वहान यो गोस्टी को, चरचा जरुर कियो जाहेत।
14 तबा यूदस इस्करियोति जोन बारा चेला मा एक चेला होतो। उ मुखिया याजक, को कठा गयो, अना ओको लक कहयो।
15 अदी मि यीसु ला तुमला धराय देहुँ, ता तुमी लोक मोला काजक देव्हो? तबा उनना यहूदा ला खुरो को तीस सिक्का, देन को मनसा करीन
16 वोच बेरा यहूदा यीसु ला धरावन को मौका ताकन लगयो।
17 बेखमीर भाकर को तिहार को पयलो दिवस मा चेला गीन यीसु को जवर आयके, पुसन लगीन, “तोरो का मरजी सेत, का आमी तोरो खावन को लाई बेखमीर जेवन को तैय्यारी किता जायके करबिन?”
18 ओना कहीस नगर मा फलानो मानूस को, कठा जायके ओको लक साँगजोस, गुरुजी कव्हसे मोरो जावन को बेरा, जवर आय गई से। मि आपरो चेला गीन को सँग, मा तोरो घर मा बलिदान को तिहार मनाहुँ।
19 तबा चेला गीन ना यीसु को, हुकूम मानिन अना बलिदान को तिहार लाय तैय्यारी करीन।
20 जबा जेवन रात भयो तबा वय, बारा चेला गीन को सँग, जेवन करन लाई बस्यो।
21 जबा वय जेवन करत होतीन, तबच, यीसु चेला गीन ला कव्हन लगियो, “मी तुमरो लक खरो कव्हसू का तुमरो लक एक मोला धराय देहे।”
22 एको पर वय गजब उदास भय गईन। अना हर एक ओको लक पुछन लगीन, ओ पिरभु का उ मि सेव?
23 वोना जवाब देईस जोन मोरो सँग ठाव मा हात, डाकीसेस वोच से।
24 मानूस को टूरा को बारे मा असो लिखयो से, उ ता जावसे पर ओना मानूस पर, हाय जेना लक मानूस को टूरा धरायो जाहे। अदी उ जलम नही लेतो, ता साजरो होतो।
25 तबा वोको धरान वालो यूदस कव्हयो, हे गुरू का उ मिच आऊ? यीसु ना कहीस, “तु ता अपरो टोंड लक साँग दियोस।”
26 जब वय जेवन करत होतीन, तबा यीसु ना भाकर लेईस। अना धन्य वाद माँग के ना तोड़के, चेला गीन ला देवन लगयो। अना कहीस, “या मोरो तन से।”
27 मंग बटका ला लेइस, अना परमेस्वर ला धनवाद देइस। अना चेला गिनला कहीस, “तुमी सब येला पी लेव।”
28 “यो मोरो रक्त से, जोन परमेस्वर को करार ला स्थापित करासेत। अना मोरो रक्त लगत लोकगिन को पापहुन को छिमा को लाय बोहायो गयो सेत।”
29 मि तुमी लक कव्हसू का मी वोना दिवस तकन अंगूर रस नहीं पीविन जबा तकन अपरो परमेस्वर बाबूजी को राज मा तुम्हारो संग नवतो अंगूर रस नही पीहुँ।
30 तबा वय भजन करतो हुवो, जैतून नाव को पहाड़ मा गईन।
31 तबा यीसु ना उनला साँगीस, आज-राती तुम सबको मोरो पर लक भरोसा उठ जाहेत। काहेका गिरंथ मा लिख्यो से, “मि चरानवालो ला, मारिन अना करप को मेढा गीन, इतानि-उतानी पराय जाहेत।
32 पर जित्तो होवन मँघा, तुमी लक पयले गलील को पहाड़ मा जाहुँ।”
33 एको पर पतरस ना कहीस, “चाहे सबा तोरो पर लक बिस्वास सोड़ देहेत पर मी आखीर तकन बिस्वास करीन।”
34 यीसु ना वोको लक कहीस, मी तोला खरो कव्हसू “आज राती कुकड़ा को बाग देवन, को पयले तु तीन बार मुकर के कहजोस, मि यीसु ला नही जानासू उ कोन से?”
35 तबा पतरस ना कहीस, “तोरो सँग मरनो भी पडे़त ता मर जाहुँ,” सबच चेला गीन ना भी असोच कहिन।
36 मंग यीसु उनको संग वोना जघा मा गयो जोन गतसमनी कहलावा सेत। अना आपरो चेला गीनला कव्हन लगयो, “इतानि बस जावो, जबा तकन मि उता जायके ना पिराथना करासू।”
37 मंग यीसु पतरस अना जबदी को दुई टूरा गीनला आपरो सँग ले गयो, अना दुखी लक उदास भय गयो।
38 मंग वोना अपरो संगी गिनला कव्हयो, “मोरो मन लगत उदास सेत, असो लगा सेत जसो मोरो जान हीटन वालो सेत। तुम्ही मोरो संग इतानी च रूको, अना चौकस रव्हो।”
39 मँग उ जरासो, पयले जायके, टोन्ड को बल पड़यो अना असो पिराथना करन लगयो। “ओ मोरो परमेस्वर बाबू, अदी भय सकासे ता या दुखको बटकी मोरो पुढा लक टल जाय, पर जसो मि चाव्हुसू, वसो नही, पर तु जसो चाव्हसेस वसोच तोरो मरजी ला पूरी कर।”
40 तबा उ आपरो चेला गीनको कठा गयो, अना वय झोपत होतीन तब यीसु पतरस लक कहीस, “का तुमी यो लायक भी नही सेव का मोरो सँग एक घडी जाग सकासेव?
41 जागत रव्हो! अना पिराथना करो, का तुमी परिक्सा मा नोको पड़ो। आतमा ता तैय्यार से, पर तन कमजोर से।”
42 मंग उ दुसरो बेरा जायके ना असो, पिराथना करन लगयो। “हे परमेस्वर मोरो बाबूजी अदी यो बटकी, मोरो बिना पिये नही हट सकसे ता तोरो मरजी पूरी कर।”
43 तबा ओना मंग उन ला, झोपत पाइस, काहे का उनको डोरा मा जप होती।
44 उनला उता छोडके, मंग चली गयो। अना वसोच तीसरो, बार पिराथना करीस।
45 तबा ओना चेला गीन को कठा आयके उनलक कहीस, अबा झोपो अना अराम करो, चोवो वा बेरा आय गई से, अना मानूस को टूरा पापी गीनको हात धरायो जाहेती।
46 उभो होय! चोवो मोरो धरान वालो कठा आय गईन।
47 यीसु असो साँगत च होतो। तबा च, यूदस जोन बारा चेला गीनमा एक होतो आयो, अना ओको सँग मुखिया याजकगीन, अना सियानो गीन, गजब भीड़ को सँग हात मा लाठी, तलवार धरके ना आइन।
48 वोको धरान वालो युदूस ना ईसारा करीस, जोन ला भी चुमु वाच यीसु से, ओला तुमी धर लेवने।
49 मंग युदूस यीसु को कठा आयके, कहीस गुरू जी नमस्कार! अना ओला खुब चुमीस।
50 यीसु ना ओको लक कहीस, ओ सँगी जोन काम को लाई तु आईसेस, ओला कर। तबा लोकगीन यीसु को कठा आयके वोला धर लेइन।
51 यीसु को सँगी मा लक एक, तरवार खीच लेइस, अना मोठो मुखिया याजक को दास को, कान काट देइस।
52 तबा यीसु ना कव्हयो, “आपरो तरवार आपरो मियान मा राख ले, काहेकि जोन तरवार चलावासेत, वय तरवार लक मारो जासे।
53 का तोला मालुम नहात? का अबा मि पिराथना करहुँ अना सरगदूत गीन को बारा दल लक ज्यादा मोरो कठा आय जाहेत।”
54 पर मी अदी असो करीन ता पवितर गीरंथ मा जो लिख्यो से, उ पूरो कसो होहे? एकोलाय, “असो होवनो जरुरी से।”
55 वोना बेरा यीसु ना भीड़ लक कव्हयो, “का तुमी तरवार डन्डा अना हतियार धरके मोला असो धरन काहे आयीसेव? जसो का मी डाकु सेऊ, मि हर दिवस तुमला मंदिर मा सीक्सा देवत होतो, तबा तुमीना मोला नही धराइ सेव।”
56 पर असो सब एकोलाय भई से का भविस्यवक्ता गीन, “को कही गई गोस्टी पूरी होहेत।” तबा सबा चेला गीन वोको कठा, लक पराय गईन।
57 जोनना यीसुला धरी होतिन, वय यीसु ला धरके काइफा नाव को मोठयो मुखिया याजक को कठा ले गईन। जहान मोसे को नियम को गुरू गीन अना सियानो गीन, अना यहुदी नेताहुन जमा भई होतीन।
58 पतरस दुहुर लक वोको, मंघा-मंघा मोठो मुखिया याजक को आँगन तकन गयो। अना भीतर जायके, का होवासे देखन लाई सिपाही गीन, को सँग बस गयो।
59 मुखिया याजक अना सब पंचयात, यीसु ला मार डाकन को लाई, वोको विरोध मा अरोप अना खोटो, गवाही को खोज मा होतीन।
60 पर लगत खोटो गवाह आवन को मंघा, भी कोनी मुद्दा नही पाईन। आखीर मा दुई जन आइन
61 अना कहीन “एना साँगीसेस की मि परमेस्वर को मंदिर ला पाड़ देहुँ, अना तीन दिवस मा जसो को तसो कर देहुँ।”
62 तबा मुखिया याजक उभो होयके कहीस, “तु कोनी जवाब नही देवासेत, लोकगीन तोरो विरोध मा, गवाही देवा सेत।”
63 पर यीसु उगो-मुगो रहयो। मुखिया पुजारी ना ओको लक कहीस, “मि तोला जित्तो परमेस्वर की किरया देवासू, की अदी तु परमेस्वर को टूरा मसीह सेस, ता आमी ला कव्ह दे।”
64 यीसु ना जवाब देयिस, “हव मी सेऊ। पर मी तुमी लक यो भी कव्हुसेउ, अता मानूस को टूरा ला सब लक ताकतवर परमेस्वर को उजो कन बसया हुया, अना बदल मा आवता चोवने।”
65 मोठोयाजक असो आयक के आपरो, कपरा फाडके कहीस, “एना परमेस्वर की निन्दा बिरोध करीसेस, अता हम ला गवाह को का मतलब?
66 तुम्ही ना परमेस्वर को बिरोधमा सांगतो आयकीसेव, अबा तुम्ही काजक सोचासेव?” “ओन्हीसीन जवाब देइन यो मार डाकन को काबिल से।”
67 तबा ओन्हिसीन ओको टोन्ड मा थुकिन। अना ओला मुक्का मारिन अना काही ना चाटा मारीन अना कहिन।
68 “हे मसीह हमरो कन लक आवन वारो गोस्टी ला साँग अना कव्हो, का तोला कोन ना मारिस?”
69 अना पतरस बाहेर आँगन मा, बसयो होतो की एक बनिहारिन ना ओको जवर आयके कहीस, तु भी ता गलीली यीसु को सँगी आस।
70 अना पतरस ना जवाब देईस, ओना सब को पुढ़ा यो कहके मनाही करीस, अना कहीस, मि नही जानासेऊ, की तु कउन को बारे कव्हसेस।
71 जबा उ बाहेर डहलाना मा चली गयो, ता दुसरी बनिहार ना पतरस ला चोयके, जोन लोक वहान होतीन कहीस, यो भी ता यीसु नासरी को सँग होतो।
72 मंग पतरस ना मना कर देईस अना सांगीस, मि कसम खासू, का मि ओना मानूस ला नही जानु।
73 जरा देर मंघा जोन वहान उभया होतीन, ओन्हिसीन पतरस को जवर आयके कहीस, खरो खर तू भी उन मा लक एक सेस। काहे की तोरी बोली तोरो भेद सांगासे।
74 तबा उ धिक्कारन लगयो, अना कसम खावन लगयो, की मि वो मानूस ला नही जानु। अना तुरुत, कुकड़ा ना चिल्लाय देईस।
75 तबा पतरस ला यीसु की कही हुयी सबद हेत, आई की, कुकड़ा को बाग देनो को पहिले तु तीन डाई मोरो मनाही करजोस। अना उ बाहेर जायके जोर लक रड़न लगयो।