1 “हे पुजाहारीत, थ्व आज्ञा छिमिगु निंतिं खः!
2 छिमिसं जिगु खँय् न्हाय्पं मबिल धाःसा, छिमिसं जिगु खँ मन्यंसा, जिगु नांयात हनाबना मतःसा जिं छिमिथाय् सराः छ्वयाहये। छिमित दइगु सुवाःयात सराः बी। छिमिसं जिगु आज्ञाय् ध्यान मब्यूगुलिं उमित सराः लाये धुंकूगु दु,” दक्व शक्ति दुम्ह परमप्रभुं धयादी।
3 “छिमिसं यानाः जिं छिमि सन्तानयात हक्के। अले छिमिसं नखःबलय् छाःपिं पशुतय्गु फोहर जिं छिमिगु ख्वालय् इलाबी। छिमित नं फोहरनापं पिने वांछ्वय् यंकी।
4 लेवी व वया सन्तानलिसें जिं यानागु बाचा दयाच्वनेमा धकाः छिमित जिं थ्व आज्ञा बियागु खः धकाः छिमिसं अले तिनि सी,” दक्व शक्ति दुम्ह परमप्रभुं धयादी।
5 “लेवीत लिसे जिं यानागु बाचा जीवन व शान्तियागु बाचा खः। इमिसं जिगु भय कायेमा धकाः जिं व इमित बिया। इमिसं जिगु भय काल अले जिगु नांयागु भय कयाः जिगु जयजय यानाच्वन।
6 जिं स्यनागु सत्ययागु खँ इमिगु म्हुतुइ हे दु। इमिगु म्हुतुसिइ छुं नं मखुगु खँ मदु। इपिं जिलिसें शान्त व स्वजा जुया जुइ। अले यक्वसित पापं फहिकल।
7 “पुजाहारीया म्हुतुसिं ज्ञानया रक्षा यायेमाः। मनूतय्सं वयागु म्हुतुं व्यवस्था मालेमाः। इपिं दक्व शक्ति दुम्ह परमप्रभुया दूत खः।
8 छिपिं धाःसा परमप्रभुयागु लँपुइ वंगु मदु। छिमिगु शिक्षां यानाः यक्व मनूत पापय् लाये धुंकल। छिमिसं लेवीतलिसें याःगु बाचा त्वाःथूगु दु,” दक्व शक्ति दुम्ह परमप्रभुं धयादी।
9 “अथे जुयाः जिं दक्व मनूतय् न्ह्यःने छिमित क्वह्यंपिं व चिधंपिं यानाबियागु दु। छाय्धाःसा छिपिं जिगु लँपुइ जूगु मदु। अझ व्यवस्थायागु खँय् तक ख्वाः स्वयाः ज्या याःगु दु।”
10 छु झी इस्राएलीत सकसियां छम्ह हे अबु मखु ला? छु छम्ह हे परमेश्वरं झीत दय्कादीगु मखु ला? अथे जूगुलिं छाय् झीसं थःथवय् विश्वासघात यानाः परमेश्वरं झी पुर्खातलिसे चिनादीगु बाचायात क्वह्यंकेगु?
11 यरूशलेमय् व इस्राएल देश न्यंकं यहूदायापिं मनूत विश्वासघाती जूगु दु अले घच्चाइपुगु ज्या याःगु दु। यहूदाया मिजंतय्सं परदेशी द्यःत पुजा याइपिं मिस्तलिसें ब्याहा यानाः परमप्रभुं माया यानादीगु पवित्र थाय्यात अपवित्र याःगु दु।
12 अथे याइम्ह न्ह्याम्ह हे जूसां, वं दक्व शक्ति दुम्ह परमप्रभुयाथाय् पशुबलि हःसां परमप्रभुं वयात इस्राएलीतपाखें चीकाः छ्वयादीमाः।
13 हानं छिमिसं थथे नं याइ – परमप्रभुयागु वेदीइ छिमिसं ख्वबि बाः वय्की, छिपिं ख्वइगु अले विलाप याइगु, छाय्धाःसा छिमिसं छाये हःगुयात वय्कलं वास्ता यानादी मखु अले उकियात लय्तायाः कयादी नं मखु।
14 छिमिसं न्यनी, “छाय्?” छाय्धाःसा परमप्रभुं छिपिं व छिमि ल्याय्म्हबलय्या कलाः दथुइया साक्षीया ज्या यानाच्वनादीगु दु। छं वलिसें विश्वासघात यात, खः ला व छिमि जीवनया पासा व व्याहाया बाचाय् चिनातःम्ह कलाः खः।
15 वय्कलं छ व छिमि कलाःयात छम्ह हे यानाः दय्कादीगु मखु ला? म्हय् व आत्माय् छिपिं वय्कःया हे खः। अले वय्कलं छु इच्छा यानादी? छिमिगुपाखें परमेश्वरयागु भय काइपिं सन्तान मालाच्वंगु दु। अथे जुयाः छिमिसं थःगु मनयात रक्षा या, अले थः ल्याय्म्हबलय्याम्ह कलाःयात ध्वंलाये मते।
16 परमप्रभु इस्राएलया परमेश्वरं धयादी, “पारपाचुकेगु ज्या जितः तसकं मयः। जितः सुनानं थः कलाःयात पार बिया वयात सास्ती ब्यूगु तसकं मयः,” दक्व शक्ति दुम्ह परमप्रभुं धयादी।
17 छिमिसं थःगु खं परमप्रभुयात हीमी चायेकूगु दु।