1 चिट्ठा तःबलय् योसेफया कुलया तःधिकःम्ह काय् मनश्शेया कुलयात लाःगु भाग थ्व हे खः। मनश्शेया तःधिकःम्ह काय् माकीर गुम्ह गिलादीतय् पुर्खा खः, वयात गिलाद व बाशान देश बी धुंकूगु खः, छाय्धाःसा माकीरीत ल्वायेसःपिं सिपाइँत खः।
2 अथे जुयाः ल्यंदुपिं मनश्शेया सन्तानत अबीएजेर, हेलेक, अस्रीएल, शकेम, हेपेर व शमीदाया वंशतय्त यर्दनया पच्छिमया इलाका भाग दत। इपिं योसेफया काय् मनश्शेया कुलयापिं मिजंत खः।
3 मनश्शेया छुइ हेपेर, माकीरया छय्, गिलादया काय् खः। वया काय् सलोफादया म्ह्याय्पिं जक दु, काय्पिं मदु। म्ह्याय्पिनिगु नां – महला, नोआह, होग्ला, मिल्का व तिर्सा खः।
4 अले इपिं एलाजार पुजाहारी, नूनया काय् यहोशू व थकालितय्थाय् वनाः धाल, “जिमित जिमि मिजंपिं थःथितिपिंनापं सर्बय् ब्यु धकाः परमप्रभुं मोशायात आज्ञा बियादीगु खः।” उकिं यहोशूं इमित परमप्रभुया आज्ञाकथं इमि ककापिं व तबाःपिंनापं सर्बय् बिल।
5 थुकथं यर्दनया पुर्बपाखे च्वंगु गिलाद व बाशान देश बाहेक मनश्शेयात पच्छिमपाखे मेगु झिब्व यर्दनया पारि दत।
6 छाय्धाःसा मनश्शेया मिजंतनापं मनश्शेया मिस्तय्त नं सर्बय् दत। मेपिं मनश्शेया सन्तानतय्त गिलाद देश बी धुंकूगु खः।
7 मनश्शेया सिमाना आशेरंनिसें कयाः शकेमया न्ह्यःने च्वंगु मिक्मतात तक थ्यन। हानं व दच्छिनपाखे न्ह्यज्यानाः एन-तप्पूहयापिं मनूत दुगु थासय् तक थ्यन।
8 तप्पुहया इलाका मनश्शेया ल्हातय् लात। मनश्शेया सिमानाय् दुगु तप्पूह शहर धाःसा एफ्राइमया सन्तानया ल्हातय् लात।
9 व सिमाना क्वय् दच्छिनपाखे क्वहां वयाः कना न्हसिकाप थ्यन। मनश्शेया शहरतय् दथुइ एफ्राइमया शहरत दु। मनश्शेया सिमाना धाःसा न्हसिकापयागु उत्तरया सिथ जुयाः समुद्रय् थ्यन।
10 दच्छिन पाखेयागु इलाका धाःसा एफ्राइमयात व उत्तर पाखेयागु मनश्शेयात दत। मनश्शेया इलाकाया सिमाना समुद्र जुल। अले उत्तर पाखेयागु सिमाना आशेर व पुर्बपाखेया सिमाना इस्साखार जुल।
11 इस्साखार व आशेरया इलाकाय् दुने लाःगु बेथ-शान, यिबलाम, डोर (अथे धाइगु नापेत-डोर), एन्दोर, तानाक व मगिद्दो शहर व प्यखेरं च्वंगु बस्ती मनश्शेयात दत।
12 अय्नं मनश्शेया सन्तानं उपिं शहरय् च्वनिपिं मनूतय्त बुके मफुत। कनानीत जिराहा जुयाः अन हे च्वनाच्वन।
13 अय्नं इस्राएलीत बल्लाये धुंकाः इमिसं कनानीतय्त दासया ज्या याकल। इमि फुक्कसित धाःसा लिना मछ्वः।
14 योसेफया सन्तानतय्सं यहोशूयात धाल, “परमप्रभुं झीत आः तक सुवाः बियावयाच्वंगु दु। जिमिगु ल्याः यक्व दु, अय्नं छाय् जिमित सर्बयया छब्व जक बियादियागु?”
15 यहोशूं लिसः बिल, “छिमिगु ल्याः यक्व दुसा अले एफ्राइमयागु पहाडी देश छिमिगु लागि चीकू जूसा परिज्जी व रपाईतय्गु देश दुने जंगलय् वनाः थःगु निंतिं सिमा पा।”
16 योसेफया सन्तानतय्सं लिसः बिल, “पहाडी देश जिमित मगाः। अले बेथ-शान व उकिया गांत अले यिजरेलयागु ब्यासिइ च्वनिपिं सकलें कनानीतय्के नँयागु रथ दु।”
17 अले यहोशूं योसेफया कुलत एफ्राइम व मनश्शेयात धाल, “छिपिं अप्वः दु अले बल्लाः, अथे जुयाः छिमित छब्व जक मखु,
18 पहाडी देशयागु गुँ नं छिमिगु हे जुइ। उकियागु सिमा पा, अले अन जःखःयागु इलाका नं छिमिगु हे जुइ। उपिं कनानीतय्के नयागु रथत दुगुलिं इपिं बल्लाः अय्नं छिमिसं इमित लिनाछ्वये फइ।”