1 परमप्रभुपाखें यर्मियायाथाय् वःगु वचन थ्व हे खः –
2 “थ्व बाचाया शर्त ध्यान बियाः न्यँ! अले यहूदा व यरूशलेमयापिं मनूतय्त धा!
3 छं इमित धा, परमप्रभु इस्राएलयाम्ह परमेश्वरं थथे धयादी – ‘थ्व बाचाया शर्त मानय् मयाइपिं मनूतय्त सराः लायेमा।
4 नँया भट्टी थें च्वंगु मिश्र देशं पितहयाबलय् जिं छिमि पुर्खातय्त थथे धयागु खः, जिगु खँ न्यँ, जिं छिमित धयागु फुक्क खँ मानय् या। अले छिपिं जिम्ह प्रजा जुइ, जि छिमि परमेश्वर जुये।
5 दुरु व कस्ति बाः वयाच्वंगु देश बी धकाः जिं छिमि तापाःबाज्यापिंलिसें पाफयागु जिं पूरा याये फयेमा धकाः जिं थथे धयागु खः।’ छिपिं आः व हे देशय् च्वनाच्वंगु दु।”
6 परमप्रभुं जितः धयादिल, “यहूदाया फुक्क शहर व यरूशलेमया गल्लि गल्लिइ वनाः थथे धाधां थ्व फुक्क वचन न्यंकि– छिमिसं थ्व बाचाया शर्त ध्यान बियाः न्यँ, अले उकियात पालन या!
7 जिं छिमि पुर्खातय्त मिश्र देशं पित हयागु दिनंनिसें थौं तक इमित मदिक्क बारम्बार ‘जिगु उजं पालन या’ धकाः ख्याच्वः बियावयाच्वनागु दु।
8 तर इमिसं ध्यान बियाः मन्यं वा जिगु खँय् न्हाय्पं मब्यू। इमिसं थःगु जिराहा व मभिंगु इच्छा कथं ज्या याना जुल। जिं इमित व बाचा पूरा यायेगु आज्ञा बियागु खः तर इमिसं अथे मयाः। उकिं व बाचाय् च्वयातःगु फुक्क सराः जिं इमिके हया।”
9 अनंलि परमप्रभुं जितः धयादिल, “यहूदा व यरूशलेमयापिं मनूतय्सं जिगु विरोधय् जाः ग्वयाच्वंगु दु।
10 जिं धयागु खँ मन्यंपिं इमि तापाःबाज्यापिन्सं थें पाप यानाः इमिसं मेपिं द्यःत पुजा याःगु दु अले इमिगु ल्यू वंगु दु। इस्राएल व यहूदाया मनूतय्सं जिं इमि तापाःबाज्यापिंलिसें चिनागु बाचायात त्वथूगु दु।
11 उकिं परमप्रभुं थथे धयादी, ‘स्व! जिं थम्हं हे इमिथाय् इपिं बचय् जुइ मफय्क विपत्ति हये। अले इमिसं जितः सःतूसां जिं लिसः बी मखु।
12 अले यहूदा व यरूशलेमयापिं मनूतय्सं थःपिन्सं बलि छाःम्ह द्यःतय्त सःती। तर विपत्तिया इलय् उपिं द्यःतय्सं इमित बचय् याये फइ मखु।
13 हे यहूदा, छिमिगु गुलि शहरत दु, उलि हे छिमि द्यःत नं दु। यरूशलेमय् गल्लि गल्लि दु, मछालापुसे च्वंम्ह बालद्यःया लागि छिमिसं धुपाँय् च्याकीगु वेदीत नं उलि हे दय्कूगु दु।’
14 “अथे जुयाः थ्व जातिया लागि प्रार्थना याये मते! थुपिं मनूतय्गु पंलिनाः बिन्ति याये मते! छाय्धाःसा इमिगु दुःखया इलय् इमिसं याःगु प्रार्थना जिं न्यने मखु।
15 “जिम्ह प्रियया जिगु देगलय् छु ज्या दु?
16 छगू इलय् परमप्रभुं छिमित भिंगु फल दुगु वाउँगु जैतूनया सिमा धकाः नां बियादीगु खः।
17 जि दक्व शक्ति दुम्ह परमप्रभुं, छिमित पिनागु खः, जिं छिमिथाय् विपत्ति हयेगु फैसला यानागु दु। छाय्धाःसा इस्राएलया घराना व यहूदाया घरानां मभिंगु ज्या याःगु दु। बालद्यःया निंतिं धुपाँय् च्याकाः जितः तंचाय्कूगु दु।
18 परमप्रभुं हे जितः धयादिल अले जिं सिल। वय्कलं हे इमिसं जिगु विरोधय् ग्वःगु जाः जितः क्यनादिल।
19 जि ला स्याये यंकेत्यंम्ह छुं मस्यूम्ह चिधिकःम्ह भ्याःचा खः। इमिसं थथे धयाः जिगु हे विरोधय् जाः ग्वःगु खः धकाः जिं मस्यूगु जुल,
20 तर हे दक्व शक्ति दुम्ह परमप्रभु, छिं खःकथं न्याय यानादी।
21 उकिं परमप्रभुं जितः छन्त स्यायेत स्वःपिं अनातोतया मनूतय्गु बारे धयादी, इमिसं थथे धाल, “छं परमप्रभुया नां कयाः अगमवाणी ल्हाये मते, मखुसा छ जिमिगु ल्हातं सी।”
22 उकिं दक्व शक्ति दुम्ह परमप्रभुं इमिगु बारे थथे धयादी, “जिं थःम्हं हे इमित सजाँय बी, इमि ल्याय्म्हपिं तरवारं व इमि काय्म्ह्याय्पिं नये मखनाः सी।
23 इपिं सुं नं बचय् जुइ मखु। छाय्धाःसा इमिगु सजाँयया दँय् जिं अनातोतया मनूतय्के विपत्ति हये।”