1 छुं ई लिपा योसेफयात सुनानं वया बौ याकूब तसकं म्हंमफय्का च्वन धकाः कं वल। योसेफ थः निम्ह काय् मनश्शे व एफ्राइमयात ब्वनाः याकूबयात स्वःवन।
2 याकूबयात सुनानं वया काय् योसेफ वयात नापलाः वःगु दु धकाः कन। व मफु मफु थः हे दनाः लासाय् फ्यतुत।
3 याकूबं योसेफयात धाल, “दक्व शक्ति दुम्ह परमेश्वरं जितः कनान देशय् लुजःय् झायाः आशिष बियाः धयादिल –
4 ‘जिं छन्त यक्व सन्तान बी। छंपाखें जिं थीथी जाति दय्के। जिं छन्त थ्व थाय् बियाच्वना, अले सदां सदांया लागि थ्व छंगु व छिमि सन्तानयागु जुइ।’
5 “जि थन मिश्रय् वये न्ह्यः थन हे बूपिं छं निम्ह काय् मनश्शे व एफ्राइम नं रूबेन व शिमियोन थें जिम्ह हे खः।
6 वयां लिपा बूपिं धाःसा जिम्ह जुइ मखु, छंम्ह हे जुइ। इमिसं वया दाजुपिं मनश्शे व एफ्राइमपाखें अंश काइ।
7 “जिं थथे छाय् यानागु धाःसा पद्दन-आरामं लिहां वयाच्वनाबलय् एप्रात (बेथलेहेम) थ्यने न्ह्यः हे कनान देशय् छिमि मां राहेल मन्त। जिं वयात अन हे लँसिथय् थुनेमाल।”
8 योसेफया काय्पिन्त खनाः इस्राएलं न्यन, “थुपिं सु?”
9 योसेफं धाल, “थुपिं जिमि काय्पिं खः। थुमित परमेश्वरं जितः थन हे मिश्रय् ब्यूगु खः।”
10 इस्राएल तसकं बुरा जुइ धुंकूगुलिं वं बांलाक मिखां मछू। उकिं योसेफं थः काय्पिन्त वयागु लिक्क यंकाबिल। अले वं इमित चुप्पा नयाः घय्पुल।
11 इस्राएलं योसेफयात धाल, “तःदँ तक ला जिं छ सी धुंकल धयाच्वनागु। अले छंगु ख्वाः स्वये खनी मखुत धयाच्वनागु। परमेश्वरं थौं जितः छिमि काय्पिन्त नापं स्वये दय्काबिल।”
12 योसेफं थः काय्पिन्त इस्राएलया पुलिं क्वकाल, अले बँय् भ्वपुलाः इस्राएलयात भागि यात।
13 योसेफं दनाः थःकाय्पिं एफ्राइमयात इस्राएलया खवय् व मनश्शेयात जवय्पाखे लाकाः न्ह्यःने यंकल।
14 तर इस्राएलं थःगु जवगु ल्हाः यंकाः एफ्राइमया छेनय् तयाबिल, अले तःधीम्ह जूसां मनश्शेया छेनय् खव ल्हाः तयाबिल।
15 इस्राएलं योसेफयात आशिष बियाः धाल –
16 जितः दुःखय् ग्वाहालि यानादीम्ह स्वर्गदूतं
17 थः बौनं जवगु ल्हाः एफ्राइमयागु छेनय् तःगु योसेफयात मयल। उकिं वं एफ्राइमयागु छेनं थः बौया ल्हाः चीकाः मनश्शेया छेनय् तयाबीत स्वल।
18 वं थः बौयात धाल, “थथे मखु बाः, थ्व न्हापां बूम्ह खः, थ्वयागु छेनय् जवगु ल्हाः तयादिसँ।”
19 वया बौनं वयागु खँ मन्यंसे धाल, “जिं स्यू पुता, जिं बांलाक स्यू। थ्वया सन्तान नं यक्व दयाः तःधनी तिनि। अय्नं थ्वया किजा थ्व स्वयां यक्व तःधनी, अले वया सन्तान थीथी जातिया पुचः जुइ।”
20 उखुन्हु इस्राएलं इमित थथे धकाः आशिष बिल,
21 अले वं योसेफयात धाल, “छं खँ हे खन, जि आः यक्व म्वाइ मखुत। परमेश्वर छिपिंनापं दी। अले वय्कलं छिमित छिमि तापाःबाज्यापिनिगु देशय् हे लित यंकी।
22 जिं छन्त छिमि दाजुकिजापिन्त स्वयाः अप्वः गुँइच्वंगु छकू बुँ बियागु दु। व बुँ जिं थःगु तरवार व धनुषया बलं एमोरीतय्पाखें त्याकाकयागु खः।”