1 अले परमेश्वरं थ्व फुक्कं खँ धयादिल,
2 “छिपिं दास दासी जुयाच्वंगु मिश्र देशं पित हयाम्ह जि परमप्रभु छिमि परमेश्वर खः।
3 जि बाहेक मेपिं द्यःतय्त आराधना याये मते।
4 “थःगु निंतिं च्वय् आकाशय् च्वंगु, क्वय् पृथ्वीइ च्वंगु व लखय् दुने च्वंगु छुकिंयागु नं मूर्ति दय्के मते।
5 छिमिसं उकियात भागि याये मते, पुजा नं याये मते। छाय्धाःसा जि हे परमप्रभु छिमि परमेश्वर खः। मेपिं द्यःतय्त पुजा याःगु जिं सह याये मफु। जिं जितः मयय्कूम्ह मनूया अधर्मया सजाँय वया छय् व छुइपिनिगु पालय् तक नं बीम्ह खः।”
6 जितः माया याइपिं व जिगु आज्ञा मानय् याइपिन्त धाःसा वया द्वलंद्वः पुस्ता तकं जिं दया माया याये।
7 “जिगु नां कयाः मखुगु पाफयाः थः परमेश्वरया नां क्वह्यंके मते। म्वाय्कं म्वाय्कं वय्कःया नां काइम्हय्सित वय्कलं सजाँय बियादी।
8 “विश्रामबारयात पवित्रगु धकाः मानय् यायेत लुमंका ति।
9 खुन्हु तक थःगु फुक्क ज्या या।
10 न्हय्न्हु खुन्हु धाःसा परमप्रभु छिमि परमेश्वरया विश्रामबारया दिं खः। थुखुन्हु छिमिसं छुं ज्या याये मते। छिमि काय् म्ह्याय्पिन्सं, छिमि दास-दासीं, छिमि पशुतय्सं व छिपिंनापं च्वनाच्वंपिं परदेशीं नं छुं ज्या मयायेमाः।
11 खुन्हु तक परमप्रभुं आकाश व पृथ्वी, समुद्र व उकी दुगु फुक्कं दय्कादिल। अले न्हय्न्हु खुन्हु आराम कयादिल। उकिं परमप्रभुं विश्रामबारयात आशिष बियाः उकियात पवित्र यानादिल।
12 “छिमिसं थः मां-बौयात हनाबना या। अले परमेश्वरं छिमित बीत्यंगु देशय् छिपिं ताःईतक म्वाइ।
13 “सुयातं स्याये मते।
14 “व्यभिचार याये मते।
15 “खुयाकाये मते।
16 “थः जःलाखःलाया विरोधय् मखुगु साक्षी बी मते।
17 “थः जःलाखःलाया छेँय्, कलाः, च्यःभ्वातिं, द्वहं, गधा व छुं खँय् नं ल्वःवंके मते।”
18 हाबलासा त्वःगु व पर्वतय् कुँ पिहां वःगु खनाः, अले नँ न्याःगु व तुरही पुयाहःगु सः ताःबलय् फुक्क मनूत ग्यानाः थरथर खात। इमिसं तापाक्कं हे दनाः।
19 मोशायात धाल, “छिं हे जिमित धयादिसँ, अले जिमिसं न्यने। परमेश्वर थः हे जिपिंलिसें खँ ल्हानादीसा जिपिं सी।”
20 मोशां इमित धाल, “ग्याये मते छाय्धाःसा परमेश्वरं छिमित जाँचय् यायेत, अले वय्कःया भय छिमिके दयेमा व छिमिसं पाप मयायेमा धकाः झायादीगु खः।”
21 मनूत तापाक्क हे च्वनाच्वन। उबलय् मोशा परमेश्वरदीगु ख्वातुगु सुपाँय्पाखे वन।
22 अले परमप्रभुं मोशायात धयादिल, “छं इस्राएलीतय्त थथे धा, ‘जिं छिपिंनापं स्वर्गं खँ ल्हानागु छिमिसं थःपिन्सं हे न्यंगु दु।
23 जि त्वःताः छुकिंयागु नं मूर्ति दय्के मते। थःगु निंतिं छिमिसं लुँ वहःया मूर्ति दय्के मते।
24 “‘जिगु निंतिं चाया वेदी दय्काः उकी हे होमबलि, मेलबलि, फैच्वलय् व सा द्वहं देछा। गन गन जिं थःगु नांयात हनाबना याके अन वयाः जिं छिमित आशिष बी।
25 छिमिसं जिगु निंतिं ल्वहंया वेदी दय्केमाल धाःसा ल्वहंयात कियाः दय्के मते। छाय्धाःसा छिमिसं उकी ज्याभः छ्यलाः उकियात अशुद्ध याइ।
26 वेदी दय्केबलय् त्वाथः तये मज्यू। मखुसा छिपिं थाहां वनीबलय् छिमिसं थःपिनिगु म्हब्व उलीगु थें जुइ।’”