1 “ཏེ༌ཏུས༌, ཁྱོ༌རང༌ངི༌ མི༌གུན༌ སྐྱོབ༌ཁན༌ ཕོ༌ཉ༌ འུ༌སྐྱོང༌ མའེ༌ཀལ༌ སྐྱོད༌ཨིན༌། ཇིག༌རྟེན༌ ཞང༌ང༌ ཛད༌པ༌ནེ༌ ཕར༌ལ༌ མ༌ཇུང༌ཁན༌ནི༌ རྡུག༌ངལ༌ལི༌ ཏུས༌ ཇུང༌ཨིན༌། ཨིན༌ནའང༌ དཀོན༌མཆོག༌གི༌ སྤེ༌ཆའེ༌ ནང༌ང༌ མིང༌ བྲིའ༌ ཛད༌ཁན༌ ཁྱོ༌རང༌ངི༌ མི༌གུན༌ སྐྱོབ༌བ༌ ཛད༌ཨིན༌།
2 སྔུན༌ལ༌ ཤི༌ཏེ༌ སུབས༌ཁན༌ མ༌ མང༌པོ༌ སོན༌ཏེའ༌ ལང༌ང༌ ཛད༌ཨིན༌, ཁ༌ཅིག༌ ཐའ༌མེད༌པའེ༌ མི༌ཚེའེ༌ ནང༌ང༌ ཡང༌ ཁ༌ཅིག༌ ཁྲེལ༌བ༌ ཉམ༌པོ༌ ཐའ༌མེད༌པའེ༌ ཉལ༌ཝའེ༌ ནང༌ང༌ ལང༌ཨིན༌།
3 ཤེས༌རབས༌ཅན༌གུན༌ ནམ༌ཁའེ༌ འོད༌ ཙོགས༌ ལྡང༌ཤན༌ ཡང༌ མི༌གུན༌ ཀྲང༌པོ༌ ཆོགས༌ལ༌ ཁྲིད༌ཁན༌ མང༌པོ༌ སྐར༌མ༌ ཙོགས༌ལ༌ ཏུས༌གྱུན༌ བར༌ཨིན༌།
4 ཨིན༌ནའང༌ དཱ༌ནི༌ཨེལ༌ ཁྱོ༌རང༌ངི༌ འི༌ སྤེ༌ར༌གུན༌ བྲིས༌ ཡང༌ སྲིལ༌ཏེ༌ ཐེ༌ཙེ༌ གྱབས༌ཏེ༌ ཐའ༌མའེ༌ ཏུས༌ ཚོག༌པ༌ བོར༌། མི༌མང༌པོ༌ འི༌ངོ༌ འ༌ངོ༌ ཚང༌མ༌ལ༌ ཆེན༌ ཡང༌ ཁོང༌གུན༌ལ༌ ལས༌ མང༌པོ༌ ལོབས༌ཏེ༌ རིག༌པའེ༌ ནང༌ང༌ གྱས༌ཨིན༌།”
5 “ཏེ༌ནེ༌ ང༌ དཱ༌ནི༌ཨེལ༌ལི༌ ལྟས༌པ༌, ངའ༌ ལྩངས༌པོའེ༌ ཐའ༌མ༌ ཉིས༌ཀོའེ༌ཀ༌ ཡང༌ ཕོ༌ཉ༌ ཉིས༌ ཞངས༌ཏེ༌ ཐོང༌།
6 ཕོ༌ཉ༌ ཅིག༌པོའེ༌ རས༌ ཀུས༌པོའེ༌ ཀོས༌ གོན༌ཁན༌, ལྩངས༌པོའེ༌ ཆུའི༌ ཁེ༌ཐོག༌ག༌ ཡོད༌ཁན༌བོའ༌ མོལས༌, “འི༌ ཇིགས༌ནང༌ དང༌ ཧ༌ལས༌ཤེས༌སི༌ ལྟས༌གུན༌ ཇུང༌ཅེས༌ལ༌ ཏུས༌ ཙམ༌ཤིག༌ གོར༌ཨིན༌?”
7 རས༌ ཀུས༌པོའེ༌ ཀོས༌ གོན༌ཁན༌, ལྩངས༌པོའེ༌ ཆུའི༌ ཁེ༌ཐོག༌ག༌ ཡོད༌ཁན༌བོའེ༌ ཁོང༌རང༌ངི༌ ཆག༌ ཉིས༌ཀོ༌ ནམ༌ཁའ༌ སྟགས༌ཏེ༌ ཏུས༌གྱུན༌ སོན༌པོ༌ ཞུགས༌ཁན༌ནི༌ ཚན༌ནི༌ ནང༌ང༌ ནའ༌ ཁུར༌ཏེ༌ མོལས༌, “ཏེ༌བོ༌ ལོ༌ སུམ༌ དང༌ ཕེད༌། རྡུག༌ངལ༌ སྟན༌ཁན༌གུན༌ནི༌ གྱབ༌གལ༌ལ༌ དཀོན༌མཆོག༌གི༌ ཏམ༌པ༌ མི༌གུན༌ནི༌ སྟོབས༌ དང༌ ཁྱུད༌ ཚང༌མ༌ མེད༌ཁན༌ ཆའ༌ཅིག༌, འི༌ ཚང༌མ༌ གྲུབ༌ཨིན༌།”
8 ངའེ༌ ཁོང༌ངི༌ མོལ༌ཁན༌བོ༌ ཚོར༌ ཨིན༌ནའང༌ ཧ༌མ༌གོ༌། ཏེ༌བོའེ༌ཕིའ༌ ངའེ༌ ཏྲིས༌པིན༌, “གཙོ༌བོ༌ལེ༌, འི༌གུན༌ནི༌ ཇུག༌བྲས༌པོ༌ ཀ༌ཟུག༌ཤིག༌ ཡོང༌ཨིན༌?”
9 ཁོང༌ངི༌ ལན༌ སལས༌, “དཱ༌ནི༌ཨེལ༌ ཁྱོ༌རང༌ ཞི༌དེ༌ ཉམ༌པོ༌ སོང༌ ཡང༌ འི༌ ཚང༌མ༌ ཐའ༌མའེ༌ ཏུས༌ ཚོག༌པ༌ ཐེ༌ཙེ༌ གྱབས༌ཏེ༌ སང༌ཝའེ༌ ནང༌ང༌ བོར༌།
10 མི༌མང༌པོ༌ ཁྲུས༌ཏེ༌ རྩང༌མ༌ ཅོས༌ཏེ༌ ལག༌མོ༌ ཀར༌པོ༌ ཅོ༌ཨིན༌ ཨིན༌ནའང༌ ངན༌པ༌གུན༌ནི༌ ཏ༌རུང༌ངའང༌ ངན༌པ༌ ཅོ༌ཅེས༌ མི༌ཕང༌། ངན༌པ༌གུན༌ལ༌ ཧ༌མི༌གོ༌ ཨིན༌ནའང༌ ཤེས༌རབས༌ཅན༌གུན༌ལ༌ ཧ༌གོ༌ཨིན༌།”
11 ཞག༌ཏང༌ངི༌ ཆོད༌པ༌ ཕུལ༌ཅེས༌གུན༌ སྒགས༌ཏེ༌ ཏེ༌ ཁམ༌ལོག༌ ཚི༌ཏུ༌ ཅོ༌ཁན༌བོ༌ ཆོད༌ཁང༌ངི༌ ནང༌ང༌ བོར༌ཏེ༌ ཞག༌ 1,290 ཆེན༌།
12 ཞག༌ 1,335 སྟིང༌ཇུག༌ ཚོག༌པ༌ སྲུངས༌ཏེ༌ དུག༌ཁན༌གུན༌ ཅིན༌ལབས༌ཅན༌ ཨིན༌།”
13 “ཏེ༌བོའེ༌ཕིའ༌ སོན༌ཏེའ༌ ལུས༌ལུས༌ ཁྱོ༌རང༌ངི༌ ཏད༌པ༌ དཀོན༌མཆོག༌གི༌ཀ༌ སྟན༌པོ༌ བོར༌། ཁྱོ༌རང༌ ཤི༌ཨིན༌ ཨིན༌ནའང༌ ཐའ༌མའེ༌ ཏུས༌ལ༌ ཐེན༌ཏེ༌ བོར༌ཁན༌ནི༌ ནོར༌སྐལ༌ ལེན༌ཅེས༌ལ༌ ཁྱོ༌རང༌ སོན༌ཏེའ༌ ལང༌ཨིན༌།”