1 ङ्योए खागु च्हौ ल्हें म्हि साक्षि मुँबइले, ताँन् खालर्बै दुःख नेरो ङ्योलाइ क्होइ थेंबै पाप स्योवासि तौदिबै क्ल्ह्योर आफेन् समा ङ्यो ढुक्कले न्हेले।
2 ङ्योए बिश्वास सुरु लब नेरो बिश्वास पूरा लमिंबै येशूलाइ मत्त्रे ङ्ह्योले। खीजी लिउँइँ तखबै सुखा मैंसि म्हिमैंइ खीए आब्रु वालेया तो धोंइ आङ्हाँन्ले क्रूसर्बै थेबै दुःख नोमिंइ। धै तोगो खी परमेश्वरए राजगद्दिए क्योलोउँइँ क्हुँइमुँ।
3 पापि म्हिमैंइ खीए बिरोधर पोंबै च्हौ ल्हें ताँमैं सैदिल् खाँबै येशूलाइ मैंन्, धै आनरल्ले ओंसों बडिद्।
4 तलेबिस्याँ पापए बिरोधर नेल् त्हुमा क्हमैं सिलन् त्हुबर आफेइमुँ।
5 परमेश्वरजी लोदा सैंदा लमिंबै ताँ क्हेमैंइ म्लेवाइ वा? क्हेमैं खीए प्हसेमैं ग। छतसि खीजी बिइ,
6 तलेबिस्याँ याहवेहजी म्हाँया लब्मैंलाइ छ्याँबै बानि तरिगे बिसि तार झोंम्,
7 आबाइ तार झोंल् म्हैब् ग बिब् मैंसि क्हेमैंइ सैदिद्। परमेश्वरजी क्हेमैंए फिर प्हसेमैंने धोंलेन् ब्यबहार लमुँ। तलेबिस्याँ आबाइ तार आझोंबै प्हसे खाब् तम् रो?
8 छतसि ताँनइ योंबै दण्ड क्हेमैंइ आयोंस्याँ क्हेमैं आबाए क्ह्रोंसेंन्बै च्हमैं आङिं, प्रग्यामैं ग।
9 ङ्योए आबामैंइ ङ्योलाइ तार झोंबइले ङ्योइ खेंमैं मान लम् बिस्याँ झन् ङ्योलाइ खोंयोंइ आखाँबै छ्ह पिंबै स्वर्गर्बै परमेश्वर आबालाइमि झन ल्हें मान लल् आत्हु वा?
10 ङ्योए आबामैंइ छ्याँब् मैंब् धों तरिगे बिसि ङ्योलाइ तिस्याँदे तार झोंइ। दिलेया परमेश्वर आबाजीम् ङ्यो खी धोंबन् पबित्र तसि ङ्योइ आशिक योंरिगे बिसि तार झोंम्।
11 तार झोंबै त्हेर दुःख तम्, दिलेया तार झोंमा सैदिल् खाँब्मैंइ लिउँइँ परमेश्वरए उँइँर छ्याँबै केमैं लसि ताँनने क्ह्रिसि टिल् खाँम्।
12 छतसि क्हेमैंए पडेयाबै योमैं क्वेद्, धै त्हारबै च्हिमैं भोंब् लद्।
13 डुड् प्हले आथुररिगे, बरु सयारिगे बिसि क्हेमैं प्रबै घ्याँ सोद् लद्।
14 ताँन् म्हिमैंने क्ह्रिब भों लद्, धै पबित्रले छ्ह थोबै सैं लद्। छले छ्ह आथोस्याँ खाबज्यै या प्रभु म्रोंल् आखाँ।
15 परमेश्वरए दयाम्हाँया आयोंब खाबै आतरिगे बिसि न्ह क्रों मि क्रों तद्। आक्ह्रिबै लमा क्हेमैंए न्होंरि फ्रेब् प्ह्राब् आतरिगे। आस्याँ ल्हें म्हिमैं पापर च्होयाब्मुँ।
16 खाबज्यै या आछ्याँबै केमैं आलरिगे धै स्योंम्बै एसाव धोंबै परमेश्वर आम्हैब आतरिगे। चइ तिछोए ल्हागिर ह्रोंसइ योंल् त्हुबै च्ह थेबाए हग त्हेवाइ।
17 लिउँइँ क्रोदै चइ चए आबाने आशिक ह्रिइ दिलेया आबाउँइँले चइ आशिक आयों। तलेबिस्याँ चइ पछुत ललेया च्ह थेबाइ योंबै हग ओंसोंन् चब् तिछोने त्हेवाल। चु ताँ क्हेमैंइ सेइमुँ।
18 स्योंम्बै इस्राएलीमैं सिनै बिबै कोंउँइँ ह्याइ, दिलेया क्हेमैं छाबै छुइल् आँखाँबै कोंर आखइमुँ। क्हेमैं लुँरिबै मि, म्लोंग्या न्हाँम्स्यो, मिछु खैबर अथवा थेबै नाँ-खैंए चेंदो या आखइमुँ।
19 क्हेमैं बेल्ले ङ्हेबै त्हुतुरुए चेंदो आखइमुँ, धै थेबै कै घ्रिए चेंदो या क्हेमैं आखइमुँ। च कै थेब्मैंइ “तारे छाबै कै थेल् आत्हुरिगे,” बिसि यो छ्युँ लइ,
20 तलेबिस्याँ “खेदोज्यै या च कों छुइस्याँ, चलाइ युँमाइ ल्हिसि सैद्,” बिबै ताँ चमैंइ सैदिल् आखाँ।
21 चर म्रोंबै सै बेल्ले ङ्हिंन् ङ्हाँब मुँल, छतमा मोशाज्यै “ङ ङ्हिंसि त्हारइ” बिल।
22 दिलेया क्हेमैंम् सियोन कोंर खइमुँ, सोगों परमेश्वरए सहरर, स्वर्गर्बै यरूशलेमर, च्योलै आखाँबै स्वर्गदूतमैं सैं तोंदै परमेश्वरए मिं क्वेबै क्ल्ह्योर,
23 स्वर्गर मिं दर्ता तबै च्ह थेब्मैंए ङाँर, ताँनए फिर छेनाले निसाफ लबै परमेश्वर ङाँर नेरो पबित्र लमिंबै ठिक के लब्मैंए प्ल्हए ङाँर क्हेमैं खइमुँ।
24 छलेन क्हेमैं नेरो परमेश्वरए म्हाँजोर छारा बाछा फैमिंबै येशू ङाँर नेरो खीए पबित्र लमिंबै कोए ङाँर खइमुँ। येशूए कोजी हाबिलए कोइ भन्दा अझै छ्याँबै ताँ पोंम्।
25 छतसि न्ह क्रों मि क्रो तद्, ङ्योने पोंबै परमेश्वरजी बिब ङिंन्। तलेबिस्याँ चु पृथ्बीर्बै म्हि मोशाइ बिबै ताँ इस्राएलीमैंइ थेल् आङिंमा चमैं दण्डउँइँले स्योल् आखाँ बिस्याँ, झन् स्वर्गउँइँले पोंबै परमेश्वरजी बिबै ताँ आङिंब्मैं खैले स्योरल् खाँमुँ?
26 च त्हेर परमेश्वरए कैइ पृथ्बी त्हारल, दिलेया तारे खीजी बाछा फैसि बिइमुँ,
27 “अझै तिखे” बिबै मतलब, लाल् खाँबै सैमैं, अथवा सृष्टि तबै सैमैं ताँन् स्योवाब्मुँ, दिलेया लाल् आखाँबै सैमैं चैरिब्मुँ बिब् ग।
28 छतसि ङ्योइ लाल् आखाँबै ग्याल्स योंबइले परमेश्वरलाइ धन्यबाद पिंले, धै खीए मान लदै खीने ङ्हिंदै खीजी खोल्ले खीए मिं क्वेले।
29 तलेबिस्याँ ङ्योए परमेश्वर नास लवाबै मि ग।