1 ओ अविश्वासी अमीर लोको! सुणी तो लओ! तुसे आपणे आऊणे वाल़े क्ल़ेशो पाँदे चींगी-चींगी की रोओ।
2 तुसा रा धन नाश ऊईगा और तुसा रे टाल़ेया खे कीड़े खाई गे।
3 तुसा रे सुईने चाँदियो खे खई लगी गी और परमेशरो जेस दिने तुसा रा न्याय करना तेस दिने तेसा खईया तुसा रे खलाफ गवाई देणी और आगी जेड़ा तुसा रा मांस खाई देणा। तुसे आखरी जुगो रे धनो पाँदे धन कट्ठा करी राखेया।
4 देखो जिने मजदूरे तुसा रे डोरू बाडे, तिना री मजदूरी, जो तुसे तोखा देई की राखी ली री, से परमेशरो रे नेड़े तुसा रे खलाफ चींगणे लगी री और तिना मजदूरा री दुहाई जिने तुसा री फसल कट्ठी कित्ती, सेनाओं रे प्रभुए रे कानो तक पऊँछी गी री।
5 तुसे तरतिया पाँदे भोग-विलासो रे लगे रे रये और बड़ा पारी सुख पाया। तुसे आपणे पापो रा कअड़ा परी ता रा और आपू खे परमेशरो री सजा खे त्यार करी राखेया।
6 तुसे बेकसुर लोक दोषी ठराई कि काई ते, से तुसा रे बिरोद नि करदे।
7 तो ओ प्यारे साथी विश्वासियो! प्रभुए रे आऊणे तक सब्र राखो। देखो, जिम्मीदार तरतिया री किमती फसला री उम्मीद राखदा ऊआ, पईली और आखरी बरखा ऊणे तक सब्र राखोआ।
8 ईंयां ई तुसे बी सब्र राखो और आपणे दिलो खे मजबूत करो, कऊँकि प्रभुए रा आऊणा नेड़े ए।
9 ओ प्यारे साथी विश्वासियो! एकी-दूजे पाँदे दोष नि लगाओ, ताकि तुसे दोषी नि ठईरो, देखो, न्याय करने वाल़ा द्वारो पाँदे खड़ी रा।
10 ओ प्यारे साथी विश्वासियो! जिने भविष्यबक्ते प्रभुए रे नाओं ते गल्ला कित्तिया, तिना खे दु:ख उठाणे और सब्र राखणे रा आपू खे आदर्श समजो।
11 देखो, आसे सब्र राखणे वाल़ेया खे धन्य बोलूँए, तुसे तो अय्युबो रे सब्रो रे बारे रे तो सुणी राखेया और प्रभुए री तरफा ते जो तेसरा फल ऊआ, से बी जाणी ला रा, जेते साथे प्रभुए री बऊत बड़ी करूणा और कृपा प्रगट ओई।
12 पर ओ प्यारे साथी विश्वासियो! सबी ते बड़ी ये गल्ल ए कि कसम नि खाणी, ना स्वर्गो री, ना तरतिया री, ना किजी ओरी चीजा री, पर तुसा री गल्ल आ री आ और ना री ना ऊणी चाईयो, ताकि तुसे परमेशरो रे दण्डो जोगे नि ठईरो।
13 जे तुसा बीचा ते कोई दु:खी ओ तो से प्रार्थना करो। जे खुशिया रे ओ तो, से स्तुतिया रे भजन गाया करो।
14 जे तुसा बीचे कोई रोगी ए, तो मण्डल़िया रे बुजुर्गा खे बुलाओ और सेयो प्रभुए रे नाओं ते तेस पाँदे तेल मल़ी कि तेसखे प्रार्थना करो।
15 और प्रभुए रे विश्वासो री प्रार्थना रे जरिए रोगी बची जाणा और प्रभुए से ठवाल़ी की ठीक करना और जे तिने पाप बी करी राखे ऊगे, तो सेयो बी माफ ऊई जाणे।
16 इजी री खातर तुसे आपू-बीचे एकी-दूजे रे सामणे आपणे-आपणे पापो खे मानी लो और एकी-दूजे खे प्रार्थना करो, जेते की ठीक ऊई जाओ, तर्मी जणे री प्रार्थना रे असरो ते बऊत कुछ ऊई सकोआ।
17 भविष्यबक्ता एलिय्याह बी तो आसा जेड़ा दु:ख-सुख सईन करने वाल़ा मांणू था और तिने पूरे तनो-मनो ते प्रार्थना कित्ती कि बादल़ नि बरसो और साडे तीन साल तक जमीना पाँदे बादल़ नि बरसे।
18 तेबे तिने प्रार्थना कित्ती तो सर्गो ते बर्खा ऊई और जमीना रे फसल लगी।
19 ओ प्यारे साथी विश्वासियो! याद राखो, जे तुसा बीचा ते कोई सच्चो री बाटा ते पटकी जाओ और कोई तेसखे मन फिराणे रे मताद करी की फेरी की ली आओ,
20 तो से ये जाणी लो कि जो कोई केसी पटके रे पापिए खे सच्चाईया री तरफा खे फेरी की ली आओगा, तेस एक प्राण मौता ते बचाणा और कई पापो पाँदे पड़दा पाणा।